టర్కీలో ఉగ్రవాద కార్యకలాపాలకు వ్యతిరేకంగా భద్రతా దళాలు చేపట్టిన అతిపెద్ద ఆపరేషన్‌లో కేవలం రెండు రోజుల్లోనే 482 మంది ఐసిస్ అనుమానిత ఉగ్రవాదులు పట్టుబడ్డారు. క్రిస్మస్ మరియు నూతన సంవత్సర వేడుకల సందర్భంగా దేశవ్యాప్తంగా దాడులకు ప్లాన్ చేస్తున్నారన్న నిఘా వర్గాల సమాచారంతో ఈ సోదాలు నిర్వహించారు. టర్కీ అంతర్గత వ్యవహారాల మంత్రి అలీ యర్లికాయ సోషల్ మీడియా వేదికగా ఈ భారీ అరెస్టుల వివరాలను వెల్లడించారు. ఇటీవల యాలోవా నగరంలో జరిగిన ఎదురుకాల్పుల అనంతరం ప్రభుత్వం ఈ నిర్ణయం తీసుకుంది.

దేశంలోని 25 ప్రావిన్సుల్లో ఏకకాలంలో నిర్వహించిన ఈ దాడుల్లో ఇంటెలిజెన్స్ మరియు కౌంటర్ టెర్రరిజం విభాగాలు పాల్గొన్నాయి. గతంలో ఇస్తాంబుల్ నైట్ క్లబ్ మరియు విమానాశ్రయంపై జరిగిన ఘోర దాడుల నేపథ్యంలో, టర్కీ మళ్లీ ఉగ్రవాదానికి కేంద్రంగా మారకుండా ఉండాలని భద్రతా దళాలు అప్రమత్తమయ్యాయి. ప్రస్తుతం దేశవ్యాప్తంగా ఉగ్రవాదుల స్లీపర్ సెల్స్ ఏరివేత ప్రక్రియ కొనసాగుతోంది.