వ్యవసాయ రంగంలో భారత్ చారిత్రాత్మక విజయాన్ని నమోదు చేసింది. ప్రపంచవ్యాప్తంగా వరి ఉత్పత్తిలో అగ్రస్థానంలో ఉన్న చైనాను వెనక్కి నెట్టి భారత్ మొదటి స్థానానికి చేరుకుంది. అమెరికాకు చెందిన యూఎస్‌డీఏ నివేదిక ప్రకారం, ప్రపంచ వరి ఉత్పత్తిలో 28 శాతం వాటాతో భారత్ అగ్రగామిగా నిలిచింది. ప్రస్తుతం భారత వరి ఉత్పత్తి 152 మిలియన్ మెట్రిక్ టన్నులకు చేరుకోగా, చైనా ఉత్పత్తి 146 మిలియన్ మెట్రిక్ టన్నులకే పరిమితమైంది. ప్రపంచవ్యాప్తంగా ఉన్న 1.23 లక్షల వరి రకాల్లో 60 వేల రకాలు మన దేశంలోనే ఉండటం విశేషం.

ఈ ఘనత భారత విదేశాంగ విధానం మరియు ఆర్థిక వ్యవస్థలో కీలక మార్పులకు దారితీస్తోంది. ప్రస్తుతం ప్రపంచంలోని 172 దేశాలకు భారత్ బియ్యాన్ని ఎగుమతి చేస్తోంది. 2024-25 ఆర్థిక సంవత్సరంలో వ్యవసాయ ఎగుమతుల ద్వారా వచ్చిన ఆదాయంలో 24 శాతం వాటా బియ్యానిదే కావడం గమనార్హం. బాస్మతీ మరియు ఇతర రకాల బియ్యం ఎగుమతి ద్వారా భారత్ గత ఏడాదిలో రూ. 1.05 లక్షల కోట్ల విదేశీ మారక ద్రవ్యాన్ని ఆర్జించింది. అంతర్జాతీయ వేదికపై భారత్ సాధించిన ఈ విజయం దేశ ప్రతిష్టను మరింత పెంచిందని నిపుణులు అభివర్ణిస్తున్నారు.