ఉత్తరప్రదేశ్‌లోని ఇటావా జిల్లా యమునా నది తీరాన ఉన్న పిలువ హనుమాన్ ఆలయం అద్భుతాలకు నిలయంగా మారింది. ఇక్కడ పవళించి ఉన్న బాల హనుమంతుడి విగ్రహం నోరు తెరిచి ఉంటుంది. భక్తులు సమర్పించే లడ్డూలు లేదా పాలు ఆ విగ్రహం నోటిలోకి వెళ్లగానే మాయమైపోతాయి. ఇలా వేల టన్నుల ప్రసాదాన్ని సమర్పించినా ఆ విగ్రహం నోరు నిండకపోవడం విశేషం. ఈ రహస్యాన్ని ఛేదించేందుకు పురావస్తు శాఖ చేసిన ప్రయత్నాలు కూడా ఇప్పటివరకు ఫలితాన్ని ఇవ్వలేదు.

సుమారు 700 ఏళ్ల చరిత్ర కలిగిన ఈ ఆలయానికి మహాభారత కాలంతో సంబంధం ఉందని చెబుతారు. విగ్రహం నోటి నుండి నిరంతరం వచ్చే బుడగలు హనుమంతుడు రామ నామాన్ని జపిస్తూ శ్వాస తీసుకుంటున్నారనడానికి నిదర్శనమని పూజారులు నమ్ముతారు. పిలువ చెట్టు కింద వెలిసిన ఈ అద్భుత విగ్రహాన్ని దర్శించుకోవడానికి దేశం నలుమూలల నుండి భక్తులు భారీగా తరలివస్తుంటారు. ఇక్కడ హనుమంతుడిని వేడుకుంటే కోరిన కోర్కెలు తప్పక నెరవేరుతాయని భక్తుల ప్రగాఢ విశ్వాసం.