ఐదేళ్ల చిన్నారిపై అత్యాచారం మరియు హత్య చేసిన కేసులో పంజాబ్ మరియు హర్యానా హైకోర్టు సంచలన తీర్పునిచ్చింది. నిందితుడికి విధించిన మరణశిక్షను 30 ఏళ్ల కఠిన కారాగార శిక్షగా మారుస్తూనే, అతని తల్లిని నిర్దోషిగా విడుదల చేసింది. తన ‘రాజా బేటా’ (ముద్దుల కొడుకు)ను కాపాడుకోవడానికి ప్రయత్నించినందుకు ఒక తల్లిని శిక్షించడానికి భారతీయ శిక్షాస్మృతిలో ఎలాంటి నిబంధన లేదని కోర్టు పేర్కొంది. సాక్ష్యాలను ధ్వంసం చేయడం లేదా కొడుకును రక్షించడం వంటి ప్రవర్తనలు నైతికంగా తప్పయినా, చట్టపరంగా నేరం కావని ధర్మాసనం స్పష్టం చేసింది.

పితృస్వామ్య సమాజంలో తల్లులు తమ కొడుకుల పట్ల చూపే గుడ్డి ప్రేమే దీనికి కారణమని జస్టిస్ అనూప్ చిత్కారా, జస్టిస్ సుఖ్వీందర్ కౌర్లతో కూడిన బెంచ్ అభిప్రాయపడింది. ఈ హత్య ముందస్తు ప్రణాళికతో జరిగింది కాదని, అత్యాచారం బయటపడుతుందనే భయంతోనే సాక్ష్యాలను నాశనం చేసే క్రమంలో జరిగిందని కోర్టు పేర్కొంది. నిందితుడు మారే అవకాశం ఉన్నందున మరణశిక్షను రద్దు చేస్తున్నట్లు వెల్లడించింది. అలాగే నిందితుడికి 30 లక్షల రూపాయల భారీ జరిమానాను కూడా విధించింది.