‘వందేమాతరం’పై పార్లమెంటులో జరిగిన చర్చ సందర్భంగా ప్రధాని నరేంద్ర మోదీ బంకిం చంద్ర చటర్జీని ‘బంకిం దా’ అని సంబోధించడంపై తృణమూల్ కాంగ్రెస్ (TMC) తీవ్ర అభ్యంతరం వ్యక్తం చేసింది. పండితుడు, మహనీయుడు అయిన బంకిం చంద్రను ‘దా’ అని పిలవడం బెంగాల్ సంస్కృతి, ‘అస్మితా’ (గౌరవం)పై దాడి అని టీఎంసీ ఆరోపించింది. ‘దా’ అనేది అన్నయ్య లేదా సమ వయస్కులను ఉద్దేశించి ఉపయోగించే పదం అని, ఒక మహనీయుడికి ఇది గౌరవప్రదమైన సంబోధన కాదని, కనీసం ‘బంకిం బాబు’ అని పిలవాలని టీఎంసీ అభిప్రాయపడింది. బెంగాలీ సంస్కారం తెలియకపోవడంపై ప్రధాని బేషరతుగా క్షమాపణ చెప్పాలని పార్టీ డిమాండ్ చేసింది.

ఈ ఘటన పశ్చిమ బెంగాల్‌లో తీవ్ర రాజకీయ దుమారాన్ని రేపింది. ‘ప్రధాని క్షమాపణ చెప్పాలి’ అనే ఉద్యమాన్ని రేపటి నుంచి సోషల్ మీడియా నుండి రోడ్లపైకి తీసుకెళ్తామని టీఎంసీ ప్రకటించింది. మరోవైపు, ‘బంకిం దా’ అని పిలవడం అవమానం కాదని పశ్చిమ బెంగాల్ బీజేపీ ఈ నిరసనను ‘నిష్ఫలమైన నాటకం’గా కొట్టిపారేసింది. పార్లమెంట్ శీతాకాల సమావేశంలో ప్రధాని సభలోకి వచ్చినప్పుడల్లా టీఎంసీ ఎంపీలు ఈ డిమాండ్‌పై నినాదాలు చేస్తారని వెల్లడైంది.