2026 టీ20 ప్రపంచ కప్‌కు మరో రెండు నెలల సమయం మాత్రమే ఉన్న తరుణంలో, భారత జట్టు కెప్టెన్ సూర్యకుమార్ యాదవ్ (Suryakumar Yadav) నిలకడ లేని ఫామ్ పెద్ద ఆందోళన కలిగిస్తోంది. కటక్‌లో దక్షిణాఫ్రికాతో జరిగిన తొలి టీ20 మ్యాచ్‌లో కూడా అతను విఫలమయ్యాడు, కేవలం 11 బంతుల్లో 12 పరుగులు మాత్రమే చేసి అవుటయ్యాడు. ఈ ఏడాది అతను ఆడిన 18 టీ20 మ్యాచుల్లో ప్రదర్శించిన నిరాశపరిచే ఆటతీరు, అతని నాయకత్వంతో పాటు, జట్టులో అతని స్థానంపై కూడా ప్రశ్నలు లేవనెత్తుతోంది.

ఈ సంవత్సరం 18 టీ20 మ్యాచుల్లో సూర్యకుమార్ కేవలం 193 పరుగులు మాత్రమే చేయగా, అతని బ్యాటింగ్ సగటు 15.07 మరియు స్ట్రైక్ రేట్ 126 మాత్రమే. ఒక్క హాఫ్ సెంచరీ కూడా నమోదు చేయలేకపోయాడు. సొంత గడ్డపై డిఫెండింగ్ ఛాంపియన్‌గా బరిలోకి దిగనున్న టీమిండియాకు ఇది పెద్ద సమస్య. ఒక క్యాలెండర్ సంవత్సరంలో ఒక భారతీయ కెప్టెన్ చేసిన అత్యల్ప టీ20 అంతర్జాతీయ సగటు ఇదే కావడం గమనార్హం.