ఐకాన్ డైరెక్టర్ సుకుమార్ మరియు మ్యూజిక్ సెన్సేషన్ దేవి శ్రీ ప్రసాద్ (DSP) మధ్య ఉన్న సుదీర్ఘ అనుబంధానికి బ్రేక్ పడనుందా అనే చర్చ ఫిలిం నగర్‌లో జోరుగా సాగుతోంది. ‘ఆర్య’ నుంచి రేపు రాబోతున్న ‘పుష్ప 2’ వరకు ప్రతి సినిమాలోనూ సుకుమార్ కేవలం డీఎస్పీకే ప్రాధాన్యత ఇస్తూ వచ్చారు. అయితే గ్లోబల్ స్టార్ రామ్ చరణ్‌తో సుకుమార్ చేయబోయే తదుపరి చిత్రం విషయంలో ఈ సారి లెక్కలు మారుతున్నట్లు సమాచారం.

ఈ భారీ ప్రాజెక్ట్ కోసం సుకుమార్ దేవి శ్రీ ప్రసాద్ స్థానంలో మరో సంగీత దర్శకుడిని తీసుకోవాలని యోచిస్తున్నారట. తాజా సమాచారం ప్రకారం, ప్రస్తుతం సౌత్ ఇండియాను ఊపేస్తున్న అనిరుధ్ రవిచందర్ పేరును సుకుమార్ పరిశీలిస్తున్నారు. స్వయంగా రామ్ చరణ్ కూడా అనిరుధ్ పేరును ప్రతిపాదించినట్లు తెలుస్తోంది. ఇన్నాళ్లూ సుకుమార్ మార్క్ మ్యూజిక్ అంటే డీఎస్పీనే అనే ముద్ర ఉండేది, కానీ ఇప్పుడు ఆ స్థానంలోకి అనిరుధ్ వస్తే సినిమా రేంజ్ మరోలా ఉంటుందని చిత్ర యూనిట్ భావిస్తోంది.

దేవి శ్రీ ప్రసాద్ మ్యూజిక్ అంటే సుకుమార్‌కు ఎంతో నమ్మకం, కానీ ఈ సినిమా కోసం కొత్త తరహా సౌండింగ్ కావాలని వారు ఈ నిర్ణయం తీసుకున్నట్లు విశ్లేషకులు భావిస్తున్నారు. ఈ మార్పుపై అధికారిక ప్రకటన రానప్పటికీ, మెగా అభిమానులు మాత్రం అనిరుధ్ ఎంట్రీ ఇస్తే మ్యూజిక్ పరంగా రికార్డులు తిరగరాయడం ఖాయమని ఆశిస్తున్నారు. సుకుమార్ తన ఆస్థాన సంగీత దర్శకుడిని కాదని అనిరుధ్‌తో వెళ్లడం ఇప్పుడు ఇండస్ట్రీలో హాట్ టాపిక్‌గా మారింది.