లైంగిక సంబంధాలకు సమ్మతి తెలిపే చట్టపరమైన వయస్సును 18 నుంచి 16కి తగ్గించాలంటూ సుప్రీంకోర్టులో పిటిషన్ దాఖలవ్వడంతో కొత్త చర్చ మొదలైంది. సీనియర్ న్యాయవాది ఇందిరా జైసింగ్ తన లిఖితపూర్వక వాదనల్లో, 16 నుంచి 18 సంవత్సరాల మధ్య వయస్సున్న వారి మధ్య పరస్పర అంగీకారంతో జరిగే లైంగిక సంబంధాలను క్రిమినల్ చట్టం పరిధి నుంచి మినహాయించాలని అన్నారు. ప్రస్తుత చట్టం పిల్లల దోపిడీకి బదులుగా, పరస్పర అంగీకారంతో జరిగే సంబంధాలను కూడా నేరంగా పరిగణిస్తోందని ఆమె వాదించారు.

ఈ ప్రతిపాదనను కేంద్ర ప్రభుత్వం వ్యతిరేకించింది. ఇది మైనర్ల దోపిడీ, దుర్వినియోగం ప్రమాదాన్ని పెంచుతుందని పేర్కొంది. ఈ విషయంలో న్యాయ నిపుణులు, బాలల హక్కుల కార్యకర్తలు కూడా విడిపోయారు. ఈ మార్పు మానవ అక్రమ రవాణా, బాల్య వివాహాలు వంటి నేరాలను పెంచుతుందని కొందరు భావిస్తుండగా, మరికొందరు మారుతున్న సామాజిక వాస్తవాలకు అనుగుణంగా చట్టాలు సంస్కరించబడాలని వాదిస్తున్నారు.