అయోధ్య రామమందిరం శిఖరంపై ప్రధాని నరేంద్ర మోదీ ‘ధర్మధ్వజాన్ని’ ఆవిష్కరించడంపై దౌత్యపరమైన వివాదం మొదలైంది. మంగళవారం జరిగిన ఈ చారిత్రక కార్యక్రమం తర్వాత, ఈ చర్య ‘ఇస్లామోఫోబియా’ను ప్రేరేపిస్తుందని, మైనారిటీల వారసత్వాన్ని అపవిత్రం చేస్తుందని పాకిస్తాన్ విదేశాంగ మంత్రిత్వ శాఖ విమర్శించింది. 1992 బాబ్రీ మసీదు కూల్చివేత అంశాన్ని కూడా ఇస్లామాబాద్ విమర్శించింది. అయితే, ఈ ఆరోపణలను భారత్ పూర్తిగా నిరాధారమైనవిగా కొట్టిపారేసింది.

బుధవారం, పాకిస్తాన్ ప్రకటనను భారత విదేశాంగ మంత్రిత్వ శాఖ ప్రతినిధి రణధీర్ జైస్వాల్ తీవ్రంగా ఖండించారు. మైనారిటీల అణచివేత, బలవంతపు మత మార్పిడులు మరియు అకృత్యాలు జరిగే దేశానికి, భారతదేశ అంతర్గత విషయాలపై వ్యాఖ్యానించడానికి నైతిక హక్కు లేదని ఆయన స్పష్టం చేశారు. రామమందిర నిర్మాణం మరియు మతపరమైన ఆచారాలు భారత రాజ్యాంగ చట్రంలోనే పూర్తయ్యాయని న్యూఢిల్లీ నొక్కి చెప్పింది. మైనారిటీలకు భద్రత కల్పించడంలో విఫలమైన పాకిస్తాన్, తమ సొంత మానవ హక్కుల ఉల్లంఘన రికార్డును విమర్శించుకోవాలని ఆయన సూచించారు.