తెలుగు రాష్ట్రాల్లో సంచలనం సృష్టిస్తున్న మొయినాబాద్ డ్రగ్స్ కేసు ఇప్పుడు రాజకీయ సెగలు రేపుతోంది. ఈ కేసులో మాజీ ఎమ్మెల్యే పైలట్ రోహిత్ రెడ్డి, రితేష్ రెడ్డిలకు డ్రగ్స్ పరీక్షల్లో పాజిటివ్ రావడంతో కోర్టు వారికి రిమాండ్ విధించింది. అయితే, టిడిపి ఎంపీ పుట్ట మహేష్ కుమార్ రక్త పరీక్షల నివేదిక ఇంకా రాకముందే వైఎస్సార్సీపీ శ్రేణులు సోషల్ మీడియా వేదికగా తప్పుడు ప్రచారం చేస్తున్నాయనే విమర్శలు వ్యక్తమవుతున్నాయి.

ముఖ్యమంత్రి చంద్రబాబు నాయుడు ఈ విషయంలో అత్యంత పారదర్శకంగా వ్యవహరిస్తున్నారు. ఎంపీ మహేష్ కుమార్ నివేదిక రాకముందే ఆయనకు షోకాజ్ నోటీసులు జారీ చేయాలని సీఎం ఆదేశించారు. అంతేకాకుండా, విచారణ పూర్తయ్యే వరకు పార్టీ మరియు ప్రభుత్వ కార్యక్రమాలకు దూరంగా ఉండాలని స్పష్టమైన ఆదేశాలు ఇచ్చారు. తప్పు చేసిన వారు ఎవరైనా సరే ఉపేక్షించే ప్రసక్తే లేదని కూటమి ప్రభుత్వం స్పష్టం చేస్తోంది.

గత వైఎస్సార్సీపీ ప్రభుత్వ హయాంలో సొంత పార్టీ నేతలు తీవ్రమైన నేరాల్లో పట్టుబడినప్పటికీ జగన్ మోహన్ రెడ్డి కనీసం నోటీసులు ఇచ్చిన దాఖలాలు లేవని రాజకీయ విశ్లేషకులు గుర్తు చేస్తున్నారు. తమ హయాంలో నేరస్తులను వెనకేసుకొచ్చిన వారు, ఇప్పుడు నిబంధనల ప్రకారం వ్యవహరిస్తున్న చంద్రబాబును విమర్శించడం హాస్యాస్పదమని కూటమి నేతలు మండిపడుతున్నారు. నివేదిక రాకముందే బురదజల్లే రాజకీయాలకు వైఎస్సార్సీపీ తెరలేపిందని వారు ఆరోపిస్తున్నారు.