పాకిస్థాన్ సివిల్ ఏవియేషన్ అథారిటీ (PCAA) బంగ్లాదేశ్‌కు చెందిన ‘బిమాన్ ఎయిర్‌వేస్’ కు ఢాకా మరియు కరాచీ మధ్య నేరుగా విమానాలను నడిపేందుకు అనుమతి ఇచ్చింది. మార్చి 2026 వరకు మూడు నెలల ట్రయల్ ప్రాతిపదికన ఈ సర్వీసులు కొనసాగుతాయి. పహల్గామ్ ఉగ్రదాడి తర్వాత పాకిస్థాన్ విమానాలపై భారత్ గగనతల ఆంక్షలు విధించడంతో, భారత గగనతలాన్ని ఉపయోగించుకునే అవకాశం ఉన్న బంగ్లాదేశ్ విమానయాన సంస్థ ద్వారా పాకిస్థాన్ ఈ మార్గాన్ని సుగమం చేసుకుంది.

ఆగస్టు 2024లో బంగ్లాదేశ్‌లో రాజకీయ మార్పుల తర్వాత పాకిస్థాన్ మరియు బంగ్లాదేశ్ మధ్య సంబంధాలు బలపడుతున్నాయి. గత ఏడాది కార్గో ఒప్పందాల తర్వాత ఇప్పుడు నేరుగా ప్రయాణికుల విమాన సర్వీసులు ప్రారంభం కావడం విశేషం. వచ్చే వారం నాటికి విమాన షెడ్యూల్ ఖరారు కానుంది. ఈ విమానాలు పాకిస్థాన్ విమానయాన నిబంధనలకు లోబడి నడుస్తాయని అధికారులు స్పష్టం చేశారు.