బొగ్గు అక్రమ రవాణాలో అనుప్ మాఝీ అలియాస్ లాలా అనుసరించిన వింత వ్యూహాన్ని ఈడీ అధికారులు వెలుగులోకి తెచ్చారు. 10 లేదా 20 రూపాయల నోట్ల నంబర్లను రహస్య కోడ్‌లుగా ఉపయోగించి ఈ దందాను నడిపించేవారు. నకిలీ ఇన్వాయిస్‌లతో పాటు ఈ నోట్ల ఫోటోలను వాట్సాప్ ద్వారా పోలీసులకు పంపితే బొగ్గు లారీలను తనిఖీలు లేకుండా అనుమతించేవారు. ఈ రహస్య సంకేత విధానాన్నే ‘లాలా ప్యాడ్’ అని పిలుస్తారు.

ఈ కుంభకోణం ద్వారా హవాలా మార్గంలో వందల కోట్ల రూపాయల లావాదేవీలు జరిగినట్లు అధికారులు గుర్తించారు. ఇందులో పోలీసు అధికారులతో పాటు పలువురు ప్రముఖుల ప్రమేయం ఉన్నట్లు సమాచారం. ఇప్పటికే ఈడీ భారీగా ఆస్తులను జప్తు చేసింది. ఈ అక్రమ రవాణా వెనుక ఉన్న సూత్రధారులను పట్టుకోవడానికి మరియు ఈ నెట్‌వర్క్ లోని ఇతర పెద్దల వివరాలను సేకరించడానికి విచారణను ముమ్మరం చేశారు.