ఉత్తరాఖండ్‌లో ముస్లిం వ్యాపారిపై దాడిని అడ్డుకున్న ‘హల్క్ జిమ్’ యజమాని దీపక్ కుమార్‌కు అండగా సుప్రీంకోర్టుకు చెందిన 20 మంది సీనియర్ న్యాయవాదులు నిలిచారు. బజరంగ్ దళ్ వేధింపుల కారణంగా జిమ్ సభ్యుల సంఖ్య గణనీయంగా తగ్గి ఆర్థిక ఇబ్బందుల్లో ఉన్న దీపక్, నేరుగా నగదు సాయం తీసుకోవడానికి నిరాకరించారు. దీంతో న్యాయవాదులు ఒక వినూత్న మార్గాన్ని ఎంచుకున్నారు.

ప్రతి న్యాయవాది ఏటా రూ. 10,000 సభ్యత్వ రుసుము చెల్లించి స్థానిక పేద యువకులకు జిమ్ శిక్షణ ఇప్పించాలని నిర్ణయించారు. దీనివల్ల దీపక్‌కు ఆదాయం లభించడమే కాకుండా పేద విద్యార్థులకు ఉచిత శిక్షణ అందుతుంది. ఇప్పటికే ఎంపీ జాన్ బ్రిట్టాస్ స్వయంగా జిమ్‌ను సందర్శించగా, రాహుల్ గాంధీ కూడా దీపక్ ధైర్యాన్ని అభినందించారు. తన పేరును గర్వంగా ‘మొహమ్మద్ దీపక్’ అని ప్రకటించుకున్న ఆయన పోరాటం అందరినీ ఆకర్షించింది.