పెళ్లి చేసుకుంటానని నమ్మించి శారీరక సంబంధం పెట్టుకున్నాక, కుండలి సరిపోలేదనే సాకుతో వివాహాన్ని నిరాకరించడం తీవ్రమైన నేరమని ఢిల్లీ హైకోర్టు స్పష్టం చేసింది. ఒక నిందితుడి బెయిల్ పిటిషన్‌ను తిరస్కరిస్తూ, ఇలాంటి చర్యలు భారతీయ న్యాయ సంహిత సెక్షన్ 69 కింద మోసపూరితమైనవిగా పరిగణించబడతాయని కోర్టు పేర్కొంది. నిరంతరం పెళ్లి హామీలు ఇచ్చి మోసం చేయడం అంగీకరించలేని విషయమని ధర్మాసనం వ్యాఖ్యానించింది.

అన్ని విడిపోయిన సంబంధాలు నేరాలు కావని, కానీ ఈ కేసులో పదేపదే వాగ్దానాలు చేసి వెనక్కి తగ్గడం తీవ్రమైన అంశమని జస్టిస్ అభిప్రాయపడ్డారు. నిందితుడు జనవరి 4 నుండి జ్యుడీషియల్ కస్టడీలో ఉన్నాడు. పెళ్లి చేసుకుంటారనే నమ్మకంతో గతంలో బాధితురాలు ఫిర్యాదును వెనక్కి తీసుకున్నప్పటికీ, మళ్ళీ అదే సాకుతో నిందితుడు మోసం చేయడంతో కోర్టు బెయిల్ నిరాకరించింది.