నైనిటాల్‌లోని బిడి పాండే జిల్లా ఆసుపత్రి సమీపంలో బుధవారం తెల్లవారుజామున భారీ అగ్నిప్రమాదం సంభవించింది. పార్కింగ్ చేసి ఉన్న ఆరు ద్విచక్ర వాహనాల పెట్రోల్ ట్యాంకులు భారీ శబ్దంతో పేలడంతో స్థానికులు భయాందోళనకు గురయ్యారు. అగ్నిమాపక సిబ్బంది సకాలంలో స్పందించి గంటసేపు శ్రమించి మంటలను అదుపు చేయడంతో పక్కనే ఉన్న ఆరోగ్య శాఖ డైరెక్టర్ కార్యాలయానికి ప్రమాదం తప్పింది. ఈ ఘటనలో ఎవరికీ గాయాలు కాకపోవడంతో అంతా ఊపిరి పీల్చుకున్నారు.

అగ్నిప్రమాదం కారణంగా విద్యుత్ లైన్లు దెబ్బతిని రోప్‌వే స్టేషన్ పరిసర ప్రాంతాల్లో విద్యుత్ సరఫరా నిలిచిపోయింది. షార్ట్ సర్క్యూట్ వల్ల ప్రమాదం జరగలేదని విద్యుత్ శాఖ అధికారులు స్పష్టం చేయగా, అగ్నిమాపక శాఖ దర్యాప్తు ప్రారంభించింది. దగ్ధమైన వాహనాలకు ఇన్సూరెన్స్ లేకపోవడంతో యజమానులకు భారీ ఆర్థిక నష్టం వాటిల్లింది. ఏడాది చివరి రోజున జరిగిన ఈ ప్రమాదం నైనిటాల్‌ పట్టణాన్ని ఉలిక్కిపడేలా చేసింది.