నల్గొండ జిల్లా శాలిగౌరారం కాంగ్రెస్ పార్టీలో కీలక పరిణామం చోటుచేసుకుంది. శాలిగౌరారం మార్కెట్ కమిటీ వైస్ చైర్మన్, కాంగ్రెస్ నాయకుడు నరిగె నర్సింహపై గతంలో విధించిన తాత్కాలిక సస్పెన్షన్‌ను ఎత్తివేస్తున్నట్లు నల్గొండ డీసీసీ అధ్యక్షుడు పున్నా కైలాస్ నేత సోమవారం అధికారికంగా ప్రకటించారు. క్రమశిక్షణ చర్యల్లో భాగంగా పార్టీ నుంచి దూరం పెట్టిన నర్సింహకు తిరిగి పార్టీలో చోటు కల్పించడం స్థానిక రాజకీయాల్లో ప్రాధాన్యత సంతరించుకుంది.

గతంలో పార్టీ జారీ చేసిన షోకాజ్ నోటీసుకు నర్సింహ ఇచ్చిన వివరణ పట్ల అధిష్టానం సంతృప్తి వ్యక్తం చేసింది. ఈ క్రమంలో భువనగిరి ఎంపీ కిరణ్ కుమార్ రెడ్డి, ఎమ్మెల్యే మందుల సామేల్ అందించిన సూచనలు, అలాగే మండల కాంగ్రెస్ పార్టీ నాయకుల అభిప్రాయాలను పరిగణనలోకి తీసుకున్న డీసీసీ ఈ నిర్ణయం తీసుకుంది. నర్సింహ వివరణ ఆమోదయోగ్యంగా ఉండటంతో ఆయనపై ఉన్న ఆంక్షలను తొలగిస్తున్నట్లు డీసీసీ స్పష్టం చేసింది.

తాజా ఉత్తర్వుల ప్రకారం, నరిగె నర్సింహ తక్షణమే కాంగ్రెస్ పార్టీ అధికారిక కార్యకలాపాల్లో పాల్గొనవచ్చు. పార్టీ బలోపేతానికి కార్యకర్తలతో కలిసి ఆయన పనిచేయనున్నారు. తనపై ఉన్న సస్పెన్షన్ ఎత్తివేయడంతో నర్సింహ అనుచరులు మరియు కాంగ్రెస్ శ్రేణులు హర్షం వ్యక్తం చేస్తున్నాయి. దీనితో శాలిగౌరారం మండల కాంగ్రెస్‌లో మళ్ళీ కొత్త ఉత్సాహం నెలకొంది.