హైదరాబాద్ శివార్లలోని నార్సింగి పోలీస్ స్టేషన్ పరిధిలో గుండెలవిసే విషాదం చోటుచేసుకుంది. ఆదివారం సాయంత్రం ఇంటి ముందు ఆడుకుంటూ కనిపించకుండా పోయిన ఆరేళ్ల బాలికను కిడ్నాప్ చేసి, అత్యాచారం చేసి, ఆపై దారుణంగా హత్య చేసిన ఘటన నగరవాసులను ఉలిక్కిపడేలా చేసింది. ఈ అమానుష ఘటన స్థానికంగా తీవ్ర కలకలం రేపింది, నిందితుడిని కఠినంగా శిక్షించాలంటూ బాధితురాలి బంధువులు, స్థానికులు ఆందోళన వ్యక్తం చేస్తున్నారు.

పోలీసుల కథనం ప్రకారం, బాలిక ఇంటికి రాకపోవడంతో ఆందోళన చెందిన తల్లిదండ్రులు రాత్రి 10 గంటల సమయంలో ఫిర్యాదు చేశారు. రంగంలోకి దిగిన పోలీసులు గాలింపు చర్యలు చేపట్టి అనుమానితుడిని అదుపులోకి తీసుకున్నారు. పోలీసుల విచారణలో నిందితుడు తన క్రూరత్వాన్ని అంగీకరించాడు. చాక్లెట్ ఇస్తానని ఆశచూపి చిన్నారిని నిర్జన ప్రదేశానికి తీసుకెళ్లి, అక్కడ అఘాయిత్యానికి పాల్పడినట్లు ఒప్పుకున్నాడు. తన పాపం ఎక్కడ బయటపడుతుందో అన్న భయంతో బాలికను గొంతు నులిమి చంపేసినట్లు నిందితుడు తెలిపాడు.

రాత్రి ఒంటి గంట సమయంలో నిందితుడు చూపిన ప్రదేశం నుండి చిన్నారి మృతదేహాన్ని పోలీసులు స్వాధీనం చేసుకున్నారు. అనంతరం పోస్టుమార్టం నిమిత్తం మృతదేహాన్ని ఉస్మానియా ఆస్పత్రికి తరలించారు. సమాజంలో పసిపిల్లలపై జరుగుతున్న ఇటువంటి దారుణాలు సభ్యసమాజాన్ని తలదించుకునేలా చేస్తున్నాయి. నిందితుడిపై కఠిన చట్టాల కింద కేసు నమోదు చేసిన పోలీసులు, త్వరితగతిన విచారణ పూర్తి చేసి శిక్ష పడేలా చూస్తామని హామీ ఇచ్చారు.