నెదర్లాండ్స్‌తో జరుగుతున్న కీలక పోరులో టీమిండియా కెప్టెన్ సూర్యకుమార్ యాదవ్ అనూహ్య నిర్ణయం తీసుకున్నారు. జట్టులోని స్టార్ స్పిన్నర్లు కుల్దీప్ యాదవ్, అక్షర్ పటేల్‌లను తుది జట్టు నుంచి తప్పించి అందరినీ ఆశ్చర్యపరిచారు.

టాస్ గెలిచి బ్యాటింగ్ ఎంచుకున్న అనంతరం సూర్య ఈ మార్పులపై స్పష్టతనిచ్చారు. కుల్దీప్ స్థానంలో పేసర్ అర్ష్‌దీప్ సింగ్‌ను తీసుకోగా, అక్షర్ పటేల్‌కు విశ్రాంతినిచ్చి వాషింగ్టన్ సుందర్‌కు అవకాశం కల్పించినట్లు తెలిపారు. డ్యూ కండిషన్స్‌లో బౌలర్ల సామర్థ్యాన్ని పరీక్షించడానికే ఈ నిర్ణయం తీసుకున్నామని, భారీ స్కోరు సాధించి బౌలర్లపై ఒత్తిడి పెంచడమే లక్ష్యమని ఆయన పేర్కొన్నారు.

మరోవైపు నెదర్లాండ్స్ కెప్టెన్ స్కాట్ ఎడ్వర్డ్స్ సైతం తాము టాస్ గెలిస్తే బ్యాటింగ్ ఎంచుకునేవాళ్లమని చెప్పారు. ఇప్పటికే సూపర్-8కు చేరిన భారత్, ఈ మ్యాచ్‌లో గెలిచి అజేయంగా లీగ్ దశను ముగించాలని పట్టుదలతో ఉంది.