కేంద్ర హోం మంత్రి అమిత్ షా బుధవారం లోక్‌సభలో ఎన్నికల సంస్కరణల చర్చలో పాల్గొని, ప్రతిపక్షాల ఆరోపణలకు గట్టిగా సమాధానం చెప్పారు. ఒక్క చొరబాటుదారుడు కూడా ఓటు వేయలేరని, చొరబాటుదారులను గుర్తించడం, తొలగించడం, బహిష్కరించడం తమ ప్రభుత్వ విధానమని ఎస్‌ఐఆర్ (SIR) అంశంపై ఆయన స్పష్టం చేశారు. ఈవీఎంలు వచ్చిన తర్వాతే ఓట్ల పెట్టెలను హైజాక్ చేయడం వంటి అవకతవకలు ఆగిపోయాయని షా అన్నారు. ఎస్‌ఐఆర్‌పై కాంగ్రెస్ పార్టీ నాలుగు నెలలుగా అబద్ధాలు ప్రచారం చేస్తోందని, ఇది ఎన్నికల పవిత్రతకు అవసరమైన ప్రక్రియ అని ఆయన పేర్కొన్నారు.

హోంమంత్రి ప్రసంగాన్ని ప్రధానమంత్రి నరేంద్ర మోదీ సోషల్ మీడియాలో ‘అద్భుతమైన ప్రసంగం’ అంటూ ప్రశంసించారు. అమిత్ షా వాస్తవాలతో దేశ ఎన్నికల ప్రక్రియలోని వివిధ అంశాలను, ప్రజాస్వామ్య బలాన్ని వివరించారని, అదే సమయంలో ప్రతిపక్షాల అబద్ధాలను కూడా బహిర్గతం చేశారని మోదీ పేర్కొన్నారు. 2004 వరకు ఎస్‌ఐఆర్ ప్రక్రియను ఏ పార్టీ వ్యతిరేకించలేదని షా గుర్తు చేస్తూ, 2025లో ఎస్‌ఐఆర్ నిర్వహించాలని ఎన్నికల సంఘం అందుకే నిర్ణయించిందని వివరించారు.