ఇరాన్‌లో కొనసాగుతున్న భారీ నిరసనలపై అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యలు అంతర్జాతీయంగా ప్రకంపనలు సృష్టిస్తున్నాయి. నిరసనకారులపై ఇరాన్ ప్రభుత్వం దాడులు చేస్తే అమెరికా చూస్తూ ఊరుకోదని, అవసరమైతే జోక్యం చేసుకుంటామని ట్రంప్ హెచ్చరించారు. దీనిపై ఇరాన్ సుప్రీం లీడర్ ఖమేనీ సలహాదారు తీవ్రంగా స్పందిస్తూ, ఇరాన్ అంతర్గత భద్రత విషయంలో జోక్యం చేసుకునే ఏ హస్తాన్నైనా నరికివేస్తామని హెచ్చరించారు. అమెరికా జోక్యం చేసుకుంటే ఈ ప్రాంతం మొత్తం అస్థిరతకు లోనవుతుందని ఇరాన్ స్పష్టం చేసింది.

2022 తర్వాత ఇరాన్‌లో జరుగుతున్న అతిపెద్ద నిరసనలు ఇవే. ఆర్థిక సంక్షోభంతో విసిగిపోయిన ప్రజలు వీధుల్లోకి రాగా, జరిగిన ఘర్షణల్లో ఇప్పటికే ఏడుగురు మరణించారు. ఇరాక్, ఆఫ్ఘనిస్తాన్‌లలో అమెరికా రెస్క్యూ రికార్డ్ తమకు తెలుసని, ఇరాన్ భద్రత తమకు ‘రెడ్ లైన్’ అని టెహ్రాన్ పేర్కొంది. సోషల్ మీడియా పోస్టుల ద్వారా రెచ్చగొట్టే చర్యలకు పాల్పడవద్దని, ఏదైనా విదేశీ దాడులు జరిగితే దానికి ప్రతిస్పందన చాలా చేదుగా ఉంటుందని ఇరాన్ పాలకుల సలహాదారు హెచ్చరించారు.