మధ్యప్రాచ్యంలో ఇరాన్ మరియు అమెరికా మధ్య ఉద్రిక్తతలు కొనసాగుతున్న తరుణంలో, ఇరాక్ ఆకాశంలో అమెరికా వైమానిక దళానికి చెందిన KC-135 ట్యాంకర్ విమానం కుప్పకూలింది. ‘ఆపరేషన్ ఎపిక్ ఫ్యూరీ’లో భాగంగా వెళ్తున్న ఈ విమానం పశ్చిమ ఇరాక్ ప్రాంతంలో ప్రమాదానికి గురైనట్లు యూఎస్ సెంట్రల్ కమాండ్ (CENTCOM) ధృవీకరించింది. అయితే, ఈ ప్రమాదం శత్రువుల దాడి వల్ల జరగలేదని, విమానం కూలిపోవడానికి గల ఖచ్చితమైన కారణాలపై దర్యాప్తు జరుగుతోందని అధికారులు వెల్లడించారు.

ప్రమాద సమయంలో రెండు KC-135 విమానాలు ఆకాశంలో ఉండగా, అందులో ఒకటి సురక్షితంగా ల్యాండ్ అయింది, రెండోది కూలిపోయింది. గాలిలో ఇతర యుద్ధ విమానాలకు ఇంధనం నింపే ఈ రకం విమానంలో సాధారణంగా ముగ్గురు సిబ్బంది ఉంటారు. ప్రస్తుతం అదృశ్యమైన విమాన సిబ్బంది కోసం అమెరికా సైన్యం భారీ స్థాయిలో సహాయక చర్యలను ప్రారంభించింది. ఇరాన్-ఇరాక్ సరిహద్దులో ఇప్పటివరకు అమెరికా కోల్పోయిన నాలుగో విమానం ఇది కావడం గమనార్హం.

మరోవైపు, కువైట్‌లో జరిగిన ఒక పొరపాటు దాడిలో అమెరికాకు చెందిన మూడు F-15E యుద్ధ విమానాలు ధ్వంసమయ్యాయి. కువైట్ గగనతల రక్షణ దళాలు పొరపాటున ఈ విమానాలను కూల్చివేసినట్లు సమాచారం. అయితే ఈ ‘ఫ్రెండ్లీ ఫైర్’ ఘటనలో ఆరుగురు విమాన సిబ్బంది పారాచూట్ల సహాయంతో సురక్షితంగా బయటపడ్డారు. వరుస విమాన ప్రమాదాలు మధ్యప్రాచ్యంలో అమెరికా సైనిక కార్యకలాపాలకు సవాలుగా మారాయి.