ప్రపంచ చలనచిత్ర రంగంలో అత్యున్నత పురస్కారంగా భావించే 98వ అకాడమీ అవార్డుల వేడుకలో భారతీయులకు గర్వకారణమైన క్షణం చోటుచేసుకుంది. గడిచిన ఏడాదిలో మరణించిన సినీ ప్రముఖులకు నివాళులర్పించే ‘ఇన్ మెమోరియం’ విభాగంలో ఈసారి భారతీయ సినీ రంగానికి చెందిన నలుగురు దిగ్గజాలను ఆస్కార్ స్మరించుకుంది. టాలీవుడ్ వెర్సటైల్ యాక్టర్ కోట శ్రీనివాసరావుతో పాటు బాలీవుడ్ లెజెండ్స్ ధర్మేంద్ర, మనోజ్ కుమార్ మరియు సీనియర్ నటి సరోజా దేవిలకు ఆస్కార్ వేదికపై ఘన నివాళులర్పించారు.

ఐదు దశాబ్దాల సినీ ప్రస్థానంలో వందలాది పాత్రలకు ప్రాణం పోసిన కోట శ్రీనివాసరావు పేరు ఆస్కార్ తెరపై కనిపించగానే తెలుగు ప్రేక్షకులు పులకించిపోయారు. హాస్యనటుడిగా, విలన్‌గా, క్యారెక్టర్ ఆర్టిస్ట్‌గా ఆయన చూపిన వైవిధ్యం, ముఖ్యంగా ఆయన డైలాగ్ డెలివరీ అకాడమీ దృష్టిని ఆకర్షించడం విశేషం. ప్రాంతీయ సినిమా సరిహద్దులు దాటి అంతర్జాతీయ స్థాయిలో గుర్తింపు పొందడానికి కోట చేసిన కృషికి దక్కిన గౌరవమిది. ఆయనతో పాటు భారతీయ సినిమాను దశబ్దాల పాటు శాసించిన ధర్మేంద్ర, మనోజ్ కుమార్ మరియు సరోజా దేవిల సేవలను కూడా ఈ వేదికపై కొనియాడారు.

ఒకప్పుడు కేవలం హాలీవుడ్ ప్రముఖులకే ప్రాధాన్యత ఇస్తుందన్న విమర్శలను పక్కన పెట్టి, అకాడమీ ఇప్పుడు ప్రపంచవ్యాప్త ప్రతిభను గుర్తిస్తోంది. గ్లోబల్ ప్లాట్‌ఫామ్‌పై మన నటుల గొప్పతనాన్ని చాటిచెప్పడం భారతీయ సినిమా ఎదుగుదలకు నిదర్శనం. బాక్సాఫీస్ రికార్డులు సృష్టించడం ఒక ఎత్తయితే, మరణానంతరం కూడా ప్రపంచం గర్వించేలా గౌరవం పొందడం మరొక ఎత్తు. కోట శ్రీనివాసరావు వంటి నటులు భౌతికంగా మన మధ్య లేకపోయినా, వారి వెండితెర అద్భుతాలు ఆస్కార్ వంటి వేదికలపై ఎప్పటికీ సజీవంగా ఉంటాయి.