తెలంగాణ అసెంబ్లీ బడ్జెట్ సమావేశాల సందర్భంగా శాసనసభ లాబీలో ఒక ఆసక్తికరమైన సన్నివేశం చోటుచేసుకుంది. బీఆర్ఎస్ వర్కింగ్ ప్రెసిడెంట్ కేటీఆర్ మరియు గోషామహల్ ఎమ్మెల్యే రాజాసింగ్ మధ్య జరిగిన సరదా సంభాషణ అందరినీ ఆకట్టుకుంది. ఇద్దరు నేతలు పరస్పరం ఆటపట్టించుకుంటూ నవ్వులు చిందించడం లాబీలో సందడి వాతావరణాన్ని నింపింది.

రాజాసింగ్ బీజేపీఎల్పీ ఛాంబర్ నుంచి బయటకు వస్తున్న సమయంలో అక్కడకు చేరుకున్న కేటీఆర్ ఆయనను సరదాగా ఏడిపించడం మొదలుపెట్టారు. “బీజేపీఎల్పీ నుంచి బయటకు వచ్చేయండి” అంటూ కేటీఆర్ చమత్కరించగా, అక్కడే ఉన్న మరో బీజేపీ ఎమ్మెల్యే పాయల్ శంకర్ స్పందిస్తూ కేటీఆర్‌ను కూడా లోపలికి ఆహ్వానించారు. దీనికి కేటీఆర్ నవ్వుతూ, “నేను గనుక బీజేపీఎల్పీ ఛాంబర్‌లోకి వస్తే మీడియా వాళ్లు ఇంకేదో రాస్తారు” అని అనడంతో అక్కడ నవ్వులు విరిశాయి.

అనంతరం తన పార్టీ మార్పుపై రాజాసింగ్ ఆసక్తికర వ్యాఖ్యలు చేశారు. పాత స్నేహితులు, పాత ఇంటిని ఎప్పుడైనా వదులుకుంటానని, ఎప్పుడైనా తిరిగి వస్తానని ఆయన పేర్కొన్నారు. తాను ఇంకా పార్టీలో చేరడంపై నిర్ణయం తీసుకోలేదని స్పష్టం చేశారు. మరోవైపు సభలో పార్టీ ఫిరాయించిన ఎమ్మెల్యేల సీట్ల కేటాయింపుపై బీఆర్ఎస్ ఎమ్మెల్యే పాడి కౌశిక్ రెడ్డి అభ్యంతరం వ్యక్తం చేశారు. స్పీకర్ గడ్డం ప్రసాద్ కుమార్ ఇప్పటికే పదిమంది ఎమ్మెల్యేలకు క్లీన్ చిట్ ఇవ్వడం గమనార్హం.