மேற்கு ஆசியாவில் போர் பதற்றம் அதிகரித்து வரும் நிலையில் உலக வர்த்தகத்தின் முக்கிய பாதையான ஹோர்முஸ் நீரிணை குறித்து ஈரான் வெளியுறவு அமைச்சர் அப்பாஸ் அராக்சி முக்கிய விளக்கம் அளித்துள்ளார். சர்வதேச கப்பல் போக்குவரத்திற்காக இந்த நீரிணை மூடப்படவில்லை என்றும் ஆனால் அமெரிக்கா மற்றும் இஸ்ரேலுடன் தொடர்புடைய கப்பல்களுக்கு மட்டும் அனுமதி கிடையாது என்றும் அவர் தெரிவித்துள்ளார். இந்த அறிவிப்பு உலகளாவிய கச்சா எண்ணெய் விநியோகத்தில் நிலவி வந்த பெரும் கவலையை சற்றே குறைத்துள்ளது.

இந்த மோதல் சூழலில் சிக்கியிருந்த 28 இந்திய சரக்கு கப்பல்களில் ஷிவாலிக் மற்றும் நந்தா தேவி உள்ளிட்ட மூன்று கப்பல்கள் பாதுகாப்பாக ஹோர்முஸ் நீரிணையை கடந்துள்ளன. மீதமுள்ள 25 கப்பல்களில் உள்ள சுமார் 600-க்கும் மேற்பட்ட மாலுமிகளை மீட்க இந்திய அரசு தீவிர நடவடிக்கைகளை மேற்கொண்டு வருகிறது. இந்தியாவின் எரிபொருள் தேவையில் பெரும் பகுதி இந்த கடல் பாதை வழியாகவே பூர்த்தி செய்யப்படுவது குறிப்பிடத்தக்கது.