அமெரிக்காவைச் சேர்ந்த தொழில்நுட்ப தொழில்முனைவோரான கேட் கோய்ட்ஸே, தான் அதிகளவில் ஸ்மார்ட்போன் பயன்படுத்துவதைக் குறைக்க ஒரு புதுமையான முயற்சியை மேற்கொண்டார். அவர் பழைய பாணியிலான லேண்ட்லைன் போன் ஹேண்ட்செட்டை புளூடூத் மூலம் ஸ்மார்ட்போனுடன் இணைத்தார். இது சமூக ஊடகங்களில் உடனடியாகப் பிரபலமடைந்தது. ‘Physical Phones’ என்ற ஆன்லைன் கடையைத் தொடங்கிய அவர், வெறும் மூன்று நாட்களுக்குள் $1,20,000 (சுமார் ₹1 கோடிக்கு மேல்) மதிப்புள்ள தயாரிப்புகளை விற்று சாதனை படைத்தார்.

தற்போது ‘Physical Phones’ இணையதளத்தில் $90 முதல் $110 வரையிலான விலையில் ஐந்து வெவ்வேறு ஹேண்ட்செட்கள் கிடைக்கின்றன. இவை ஐபோன் மற்றும் ஆண்ட்ராய்டு ஃபோன்களுடன் புளூடூத் மூலம் இணைக்கப்பட்டு சாதாரண அழைப்புகளுடன் WhatsApp மற்றும் FaceTime போன்ற ஆப் அழைப்புகளையும் ஏற்கின்றன. அதிகப்படியான ஸ்க்ரீன் நேரத்திற்கு எதிரான பொதுமக்களின் அதிருப்தியே இந்த ஹேண்ட்செட்களின் வெற்றிக்குக் காரணம் என்று கோய்ட்ஸே நம்புகிறார். உற்பத்தியை அதிகரிக்க ஒரு மின்னணு தொழிற்சாலையுடன் அவர் ஒப்பந்தம் செய்துள்ள நிலையில், 2025 டிசம்பர் முதல் முதல் பெரிய தொகுதி விநியோகம் தொடங்கும்.