சீனாவின் வர்த்தக மையமான ஷாங்காய் நகரில் பரபரப்பான சாலை ஒன்று திடீரென உள்வாங்கி பிரம்மாண்ட பள்ளம் ஏற்பட்ட சம்பவம் பெரும் பரபரப்பை ஏற்படுத்தியுள்ளது. மின்காங் மாவட்டத்தில் உள்ள முக்கிய நெடுஞ்சாலையில் எதிர்பாராத விதமாக ஏற்பட்ட இந்த நிலச்சரிவு (Sinkhole), அந்தப் பகுதி மக்களையும் வாகன ஓட்டிகளையும் கடும் அதிர்ச்சியில் ஆழ்த்தியுள்ளது.

மெட்ரோ பணியால் நேர்ந்த விபரீதம்

ஆரம்பகட்ட விசாரணையில், அந்தப் பகுதியில் நடைபெற்று வரும் மெட்ரோ ரயில் சுரங்கப்பாதை கட்டுமானப் பணியின் போது ஏற்பட்ட நீர் கசிவுதான் இந்த விபத்திற்கு முக்கிய காரணம் எனத் தெரியவந்துள்ளது. சுரங்கப் பணிகளுக்காக தோண்டப்பட்ட இடத்திற்கு அடியில் நீர் கசிந்ததால், மண்ணின் உறுதித்தன்மை குறைந்து சாலை அப்படியே சீட்டுக்கட்டு போல சரிந்து விழுந்துள்ளது.

முடங்கிய போக்குவரத்து

இந்த பிரம்மாண்ட பள்ளம் ஏற்பட்டதன் விளைவாக, ஆயிரக்கணக்கான பயணிகள் தினசரி பயன்படுத்தும் அந்த முக்கிய போக்குவரத்து வழித்தடம் முற்றிலும் துண்டிக்கப்பட்டுள்ளது. அதிர்ஷ்டவசமாக இந்த விபத்தில் உயிரிழப்புகள் ஏதும் ஏற்படவில்லை என்றாலும், பரபரப்பான சாலை திடீரென காணாமல் போனது பொதுமக்களிடையே பெரும் பாதுகாப்பற்ற உணர்வை ஏற்படுத்தியுள்ளது.

நிர்வாகத்தின் நடவடிக்கை

சம்பவ இடத்திற்கு விரைந்த அதிகாரிகள் சாலையை சீரமைக்கும் பணிகளை போர்க்கால அடிப்படையில் தொடங்கியுள்ளனர். இருப்பினும், இந்த விபத்து நகர்ப்புற வளர்ச்சியின் பெயரால் மேற்கொள்ளப்படும் திட்டமிடப்படாத அகழ்வாராய்ச்சிப் பணிகளின் ஆபத்தை வெளிச்சம் போட்டுக்காட்டியுள்ளது. ஒரு சர்வதேச நகரத்தின் உள்கட்டமைப்பு இவ்வளவு பலவீனமாக இருப்பது பொதுமக்களிடையே பல்வேறு கேள்விகளை எழுப்பியுள்ளது.

சீனாவின் இத்தகைய தொழில்நுட்ப கோளாறுகள் மற்றும் கட்டுமான குறைபாடுகள் மீண்டும் ஒருமுறை சர்வதேச அளவில் பேசுபொருளாகியுள்ளது.