புஷ்கர் திருவிழாவின் புழுதி படிந்த சந்துகளில், ஒரு முகம் உலகத்தையே திரும்பிப் பார்க்க வைத்தது. இன்ஸ்டாகிராம் போன்ற சமூக ஊடகங்கள் உருவாவதற்கு பல ஆண்டுகளுக்கு முன்பே, ராஜஸ்தானைச் சேர்ந்த ஒரு சிறுமி தனது காந்தக் கண்களால் எல்லைகளைக் கடந்து உலகப் புகழ்பெற்றார். இன்று, இரண்டு தசாப்தங்களுக்குப் பிறகு, ‘பாப்பு தேவி’யின் அந்த “சிங்கக் கண்கள்” புகைப்படம் மீண்டும் இணையத்தில் வைரலாகி வருகிறது.

20 ஆண்டுகளுக்கு முன்பு நிகழ்ந்த ஒரு கிளிக்கும்… உலகப் புகழும்!

இந்தக் கதை சுமார் 20 ஆண்டுகளுக்கு முன்பு தொடங்கியது. ஒரு வெளிநாட்டுப் புகைப்படக் கலைஞர், புஷ்கர் வீதிகளில் ஒரு சிறுமி பொருட்களை விற்பனை செய்வதைக் கண்டார். அவளது பிரகாசமான மஞ்சள் கலந்த பச்சை நிறக் கண்கள் அவரை வியப்பில் ஆழ்த்தின. அவர் எடுத்த அந்த ஒரு சாதாரணப் புகைப்படம், ராஜஸ்தான் சுற்றுலாவின் அடையாளமாக மாறியது. அஞ்சல் அட்டைகள் (Postcards) முதல் சுற்றுலா அங்காடிகள் வரை அந்த முகம் எங்கும் நீக்கமற நிறைந்திருந்தது.

பாப்பு தேவி இப்போது எங்கே இருக்கிறார்?

தற்போது 30 வயதாகும் பாப்பு தேவி, இப்போதும் புஷ்கரின் அதே வீதிகளில் தான் வசிக்கிறார். அங்கு ஒரு சிறிய கடை நடத்தி வரும் அவர், கைவினைப் பொருட்கள் மற்றும் ‘பஞ்சாரா’ பாணி பைகளை விற்பனை செய்து வருகிறார். சுவாரஸ்யமான விஷயம் என்னவென்றால், அவர் விற்கும் அஞ்சல் அட்டைகளில் இப்போதும் அவரது சிறுவயது புகைப்படமே அச்சிடப்பட்டுள்ளது. ஒரு சஃபாரி ஓட்டுநரைத் திருமணம் செய்துகொண்ட இவருக்கு மூன்று மகள்கள் உள்ளனர். இதில் வியப்பு என்னவென்றால், இவரது இரண்டு மகள்களும் தாயைப் போலவே அதே வசீகரிக்கும் கண்களைப் பாரம்பரியமாகப் பெற்றுள்ளனர்.

இந்தக் கண்கள் உண்மையானவை தானா?

பாப்பு தேவி மற்றும் அவரது மகள்களின் கண்களைப் பார்க்கும் சுற்றுலாப் பயணிகள் பெரும்பாலும் அதிர்ச்சியடைகின்றனர். அவர்கள் காண்டாக்ட் லென்ஸ் (Contact Lens) அணிந்துள்ளார்களா என்று பலரும் கேட்கிறார்கள். ஆனால், இது தனது இயற்கையான அழகு என்று அவர் ஒரு நேர்காணலில் உறுதிப்படுத்தியுள்ளார்.

பலர் அவரை ‘பஞ்சாரா’ (நாடோடி இனத்தவர்) என்று தவறாக நினைக்கிறார்கள். ஆனால் தான் அந்த சமூகத்தைச் சேர்ந்தவர் அல்ல என்றும், சுற்றுலாப் பயணிகளைக் கவர்வதற்காகவும் தனது கண்களின் அழகை மெருகூட்டவும் மட்டுமே அந்த பாணி உடைகளை அணிவதாக அவர் தெளிவுபடுத்தியுள்ளார்.