தேனி மாவட்டம் ஆண்டிப்பட்டி தொகுதிக்குட்பட்ட வருசநாடு அருகே உள்ள வெள்ளிமலை எஸ்டேட் பகுதியில் வெறும் ஐந்து வாக்காளர்களுக்காக ஒரு வாக்குச்சாவடி அமைக்க தேர்தல் ஆணையம் முடிவு செய்துள்ளது. அடர்ந்த வனப்பகுதியில் அமைந்துள்ள இந்த இடத்திற்குச் செல்ல முறையான சாலை வசதிகள் இல்லை என்பதால் அங்கு செல்வதற்கு மூன்று மணி நேரம் ஆகும். இதன் காரணமாகவே அங்கு வசிக்கும் தொழிலாளர்களின் எண்ணிக்கை மிகக் குறைவாக உள்ளதாகக் கூறப்படுகிறது.

ஜனநாயகத்தில் ஒவ்வொரு வாக்கும் முக்கியம் என்பதை உணர்த்தும் வகையில் துரைச்சாமி மரகதம் தொடக்கப்பள்ளியில் இந்த வாக்குச்சாவடி அமையவுள்ளது. இங்கு செந்தில், ஜெயராணி, பவுல், சுதா மற்றும் ரோகித் ஆகிய ஐந்து பேர் மட்டுமே வாக்களிக்க உள்ளனர். இது குறித்துப் பேசிய தலைமை தேர்தல் ஆணையர் ஞானேஷ்குமார் இந்த நடவடிக்கையை ஜனநாயகத் திருவிழாவின் மகுடம் என்று பெருமிதத்துடன் குறிப்பிட்டுள்ளார்.