அமெரிக்க தர நிர்ணய நிறுவனமான ஃபிட்சின் சாதகமான அறிக்கையின்படி, ஏப்ரல்-ஜூன் மாதங்களில் பதிவான 7.8% பொருளாதார வளர்ச்சியை விஞ்சி, அடுத்த மூன்று மாதங்களில் இந்தியாவின் ஜிடிபி விகிதம் 8.2% ஆக உயர்ந்துள்ளது. இந்த ஊக்கமளிக்கும் பொருளாதார முன்னேற்றங்களுக்கு மத்தியில், பிரதமர் நரேந்திர மோடி, பொருளாதார வளர்ச்சியின் ‘இந்து விகிதம்’ குறித்த பழைய கருத்தை கடுமையாக விமர்சித்தார். சனிக்கிழமை (டிசம்பர் 6, பாபர் மசூதி இடிப்பு தினத்தில்) 23வது ‘இந்துஸ்தான் டைம்ஸ் லீடர்ஷிப் உச்சி மாநாட்டில்’ பேசிய மோடி, “சில தசாப்தங்களுக்கு முன்பு வரை, இந்தியாவின் மெதுவான நிதி வளர்ச்சியை ‘இந்து வளர்ச்சி விகிதம்’ என்று முத்திரை குத்தி, இந்துக்களின் வாழ்க்கை முறை அவமதிக்கப்பட்டது” என்று வலியுறுத்தினார். கடந்த பத்தாண்டுகளில் தனது ஆட்சியின் கீழ் இந்த நிலைமை மாறியுள்ளதாக அவர் கூறினார்.

மேலும் பேசிய பிரதமர், உலகமே மந்தநிலையை எதிர்கொள்ளும் இந்த நிச்சயமற்ற காலகட்டத்தில், இந்தியா நம்பிக்கையுடன் பொருளாதார வளர்ச்சியின் புதிய கதையை எழுதி, நம்பிக்கையின் தூணாக எழுந்து வருகிறது என்றார். மோடி தனது உரையில் முந்தைய காங்கிரஸ் அரசாங்கத்தை கடுமையாக விமர்சித்தார், அந்தக் கட்சி தங்கள் சொந்த குடிமக்களின் மீது நம்பிக்கை கொண்டிருக்கவில்லை என்று குற்றம் சாட்டினார். காலனித்துவ மனநிலையில் இருந்து தேசத்தை விடுவிப்பதன் அவசியத்தையும், பொருத்தமான நடவடிக்கைகள் மூலம் குடிமக்களை 10 ஆண்டுகள் முன்னோக்கி கொண்டு செல்வதன் அவசியத்தையும் அவர் வலியுறுத்தினார். இந்தியா இப்போது ‘விஸ்வகுரு’வாக (உலக குரு) முழு உலகிற்கும் தலைமை தாங்குகிறது என்று மோடி நம்புகிறார்.