ஈரானின் முக்கிய மூலோபாய மையமான சபாஹர் துறைமுகத்திற்கு அருகிலுள்ள ராணுவ தளம் மீது அமெரிக்க போர் விமானங்கள் தாக்குதல் நடத்தியுள்ளன. திங்களன்று நடந்த இந்தத் தாக்குதலில் அப்பகுதியில் சக்திவாய்ந்த வெடிச் சத்தங்கள் கேட்டதாகக் கூறப்படுகிறது. இந்தச் சம்பவம் குறித்து அமெரிக்கா அல்லது ஈரான் அதிகாரப்பூர்வமாக எதையும் அறிவிக்கவில்லை என்றாலும், சமூக வலைதளங்களில் வெளியான வீடியோக்கள் அமெரிக்க போர் விமானங்களின் நடமாட்டத்தை உறுதிப்படுத்துகின்றன.

இந்தியாவைப் பொறுத்தவரை ஆப்கானிஸ்தான் மற்றும் மத்திய ஆசிய நாடுகளுடனான வர்த்தகத்திற்கு சபாஹர் துறைமுகம் மிக முக்கியமானது. கோடிக்கணக்கான ரூபாய் முதலீடு செய்யப்பட்டுள்ள இந்தத் துறைமுகப் பகுதியில் போர் பதற்றம் ஏற்பட்டுள்ளது புது தில்லிக்கு கவலையை அளித்துள்ளது. ஈரான் வழியாக இந்தியக் கப்பல்கள் செல்ல அனுமதி கிடைத்த சில நாட்களிலேயே இந்தத் தாக்குதல் நடந்துள்ளது பிராந்திய பாதுகாப்பில் பெரும் அச்சுறுத்தலை ஏற்படுத்தியுள்ளது.