மத்திய கிழக்கு போரின் ஒரு பகுதியாக கூகுள், மைக்ரோசாஃப்ட் மற்றும் அமேசான் போன்ற அமெரிக்க தொழில்நுட்ப நிறுவனங்களை ஈரான் தனது ராணுவ இலக்குகளாக அறிவித்துள்ளது. இந்த நிறுவனங்கள் அமெரிக்க மற்றும் இஸ்ரேலிய ராணுவத்திற்கு உதவி செய்வதாக ஈரான் குற்றம் சாட்டியுள்ளது. ஏற்கனவே ஐக்கிய அரபு அமீரகம் மற்றும் பஹ்ரைனில் உள்ள அமேசான் தரவு மையங்கள் மீதான ட்ரோன் தாக்குதல்களால் வங்கி மற்றும் சுகாதார சேவைகள் கடுமையாக பாதிக்கப்பட்டுள்ளன.

நவீன போரின் புதிய உத்தியாக எதிரியின் தகவல் தொழில்நுட்ப கட்டமைப்பை முடக்கும் முயற்சிகள் தற்போது முன்னெடுக்கப்படுகின்றன. இந்த மோதல் நீடித்தால் எரிசக்தி சந்தை மட்டுமின்றி, உலகளாவிய இணையம் மற்றும் கிளவுட் சேவைகள் முற்றிலும் முடங்கும் என நிபுணர்கள் எச்சரிக்கின்றனர். இதன் காரணமாக தொழில்நுட்ப அலுவலகங்களில் இருந்து விலகி இருக்குமாறு ஈரான் தனது குடிமக்களுக்கு அறிவுறுத்தியுள்ளது, இது உலகப் பொருளாதாரத்தில் பெரும் நெருக்கடியை ஏற்படுத்தும் என அஞ்சப்படுகிறது.