ஏர் இந்தியா நிறுவனம் செப்டம்பர் 1 முதல் புது டெல்லிக்கும் வாஷிங்டன் டி.சி.க்கும் இடையிலான நேரடி விமான சேவையை நிறுத்துவதாக அறிவித்துள்ளது. சேவை தொடர்பான காரணங்களுக்காக இந்த முடிவு எடுக்கப்பட்டுள்ளதாக நிறுவனம் தெரிவித்துள்ளது. சமீபத்தில் ஏர் இந்தியாவின் பல போயிங் 787-8 ட்ரீம்லைனர் விமானங்கள் நவீனமயமாக்கப்பட்டு வருவதால், அனைத்து வழித்தடங்களிலும் இயக்க போதுமான விமானங்கள் இல்லை.

பயணிகளின் சிரமத்தைக் கருத்தில் கொண்டு, மாற்று ஏற்பாடுகள் மற்றும் பயணச்சீட்டுக்கான பணத்தைத் திரும்ப வழங்கவும் நிறுவனம் முடிவு செய்துள்ளது. நேரடி விமான சேவை நிறுத்தப்பட்டாலும், பயணிகள் நியூயார்க், சிகாகோ அல்லது பிற நகரங்கள் வழியாக ‘ஒன் ஸ்டாப்’ சேவையைப் பயன்படுத்தி வாஷிங்டனை அடையலாம். பாகிஸ்தானின் வான்வெளி மூடப்பட்டதும் இந்த முடிவுக்கு ஒரு காரணமாகக் கூறப்படுகிறது.