இந்தியா மற்றும் ஓமன் இடையிலான சுதந்திர வர்த்தக ஒப்பந்தம் அடுத்த மூன்று மாதங்களில் செயல்பாட்டுக்கு வரும் என்று மத்திய அமைச்சர் பியூஷ் கோயல் தெரிவித்துள்ளார். இந்த ஒப்பந்தத்தின் மூலம் ஓமன் நாட்டிற்கு ஏற்றுமதி செய்யப்படும் இந்தியாவின் 99.38 சதவீத பொருட்களுக்கு இறக்குமதி வரி முழுமையாக ரத்து செய்யப்படுகிறது. தற்போது 5 முதல் 100 சதவீதம் வரை வரி விதிக்கப்படும் நிலையில், இந்த மாற்றத்தால் ஜவுளி, தோல் பொருட்கள், ஆபரணங்கள் மற்றும் விவசாயப் பொருட்கள் உள்ளிட்ட துறைகள் பெரும் லாபத்தை ஈட்டும். இது இந்திய ஏற்றுமதியாளர்களுக்கு உலக சந்தையில் ஒரு பெரிய வாய்ப்பாக அமையும்.

இந்த ஒப்பந்தம் வர்த்தகத்தை எளிதாக்குவது மட்டுமின்றி, எரிசக்தி, கல்வி மற்றும் சுகாதாரம் போன்ற துறைகளில் புதிய முதலீடுகளை ஈர்க்கும். ஓமனின் ஒரு பால் நிறுவனம் இந்தியாவின் அமுல் நிறுவனத்துடன் இணைந்து செயல்பட ஆர்வம் காட்டியுள்ளது. பசுமை ஹைட்ரஜன் மற்றும் எஃகு உற்பத்தியில் இரு நாடுகளும் கூட்டாக முதலீடு செய்ய வாய்ப்புகள் உள்ளன. ஓமனில் உள்ள பரந்த நிலப்பரப்புகளை இந்திய நிறுவனங்கள் பயன்படுத்தி தொழிற்சாலைகளை அமைக்க முடியும். இதன் மூலம் இந்தியாவின் ஏற்றுமதி அதிகரிப்பதோடு மட்டுமல்லாமல், நாட்டின் இளைஞர்களுக்குப் புதிய வேலைவாய்ப்பு வசதிகளும் பெருகும் என எதிர்பார்க்கப்படுகிறது.