விமானங்களின் எண்ணிக்கையின் அடிப்படையில் உலக விமான சேவை நிறுவனங்களின் பட்டியலில், இந்திய உள்நாட்டு விமான நிறுவனமான இண்டிகோ 8வது இடத்தில் உள்ளது. சமீபத்தில் தொழில்நுட்ப சிக்கலால் இண்டிகோ ஒரு பெரிய நெருக்கடியைச் சந்திக்கும் நிலையில், உலகிலேயே மிகப்பெரிய விமான நிறுவனங்கள் எவை, அவற்றின் வசம் எத்தனை விமானங்கள் உள்ளன என்ற கேள்வி எழுந்துள்ளது. விமானங்களின் எண்ணிக்கையைப் பொறுத்தவரை, அமெரிக்காவின் ‘யுனைடெட் ஏர்லைன்ஸ்’ சுமார் 1,050 முதல் 1,055 ஜெட் விமானங்களுடன் முதலிடத்தில் உள்ளது. அதன் விமானக் குழுவில் போயிங் 737 மேக்ஸ் சீரிஸ் மற்றும் 787 ட்ரீம்லைனர் போன்ற அதிநவீன போயிங் மற்றும் ஏர்பஸ் விமானங்கள் அடங்கும்.

யுனைடெட் ஏர்லைன்ஸ் நிறுவனத்திற்கு அடுத்தபடியாக, 1,002 விமானங்களுடன் ‘அமெரிக்கன் ஏர்லைன்ஸ்’ இரண்டாவது இடத்தில் உள்ளது. தினசரி பயணிகள் மற்றும் விமானங்களை இயக்குவதில், இது உலகின் மிகப்பெரிய விமான நிறுவனமாகக் கருதப்படுகிறது. மறுபுறம், இந்தியாவின் சுமார் 66% விமானப் பயணிகளை ஏற்றிச் செல்லும் இண்டிகோ, 417 விமானங்களுடன் பட்டியலில் எட்டாவது இடத்தில் உள்ளது. விமானங்களின் எண்ணிக்கையில், இந்திய விமான நிறுவனங்களை விட சர்வதேச நிறுவனங்களின் விமானக் குழுக்கள் மிக பெரியவை என்பதை இந்தப் புள்ளிவிவரங்கள் தெளிவாகக் காட்டுகின்றன.