ஸ்ட்ராபெர்ரி சந்திரன் முதல் பட்டாம்பூச்சி விண்மீன் கூட்டம் வரை: விண்வெளி ஒரு மர்மமான மற்றும் கவர்ச்சிகரமான உலகம். நட்சத்திரங்கள், கிரகங்கள், விண்கற்கள் – இவை அனைத்தும் நம்மை வியப்பில் ஆழ்த்துகின்றன.

ஒவ்வொரு மாதமும் வானில் சில அசாதாரண காட்சிகள் தோன்றும். ஜூன் மாதத்தில் நிகழவிருக்கும் 9 வானியல் நிகழ்வுகள் பற்றி இப்போது தெரிந்து கொள்வோம்.

ஜூன் 1: வெள்ளி கிரகத்தின் அற்புதமான காட்சி

ஜூன் 1 அன்று, வெள்ளி கிரகம் சூரியனில் இருந்து மேற்கு திசையில் அதிகபட்ச தூரத்தில் இருக்கும். இது “மிகப்பெரிய மேற்கு நீட்சி” என்று அழைக்கப்படுகிறது. வெள்ளியைக் காண இது ஒரு சிறந்த நேரம். அதிகாலையில், வட அரைக்கோளத்தில் கிழக்கு வானிலும், தென் அரைக்கோளத்தில் கிழக்கு-வடக்கு திசையிலும் வெள்ளியை காணலாம்.

ஜூன் 2: பெரிய ஹெர்குலஸ் கிளஸ்டர்

இது ஆயிரக்கணக்கான நட்சத்திரங்களால் ஆன ஒரு பெரிய கோள வடிவ நட்சத்திரக் கூட்டமாகும். இதை மெஸ்ஸியர் 13 அல்லது ஹெர்குலஸ் கிளஸ்டர் என்று அழைக்கிறார்கள். ஜூன் 2 அன்று இது வானில் மிக உயர்ந்த நிலையை அடையும். பைனாகுலர்கள் மூலம் இதை தெளிவாகக் காணலாம். வானியலாளர் எட்மண்ட் ஹாலி இதை 1714 ஆம் ஆண்டில் கண்டுபிடித்தார்.

ஜூன் 7: ஆரிட்டிட் விண்கல் மழை

மற்ற விண்கல் மழைகளில் இருந்து இது வேறுபட்டது, ஏனெனில் இது பகல் நேரத்தில் தோன்றும் ஒரு விண்கல் மழை. இருப்பினும், அதிகாலைக்கு முன் எழுந்தால், சில சமயங்களில் வண்ணமயமான ஒளியின் சிறிய புள்ளிகளைக் காணலாம்.

ஜூன் 11: ஸ்ட்ராபெர்ரி சந்திரன்

ஜூன் மாத பௌர்ணமி ஸ்ட்ராபெர்ரி சந்திரன் என்று அழைக்கப்படுகிறது. சந்திரன் சிவப்பு நிறத்தில் இருக்காது, ஆனால் இந்த பெயர் வட அமெரிக்க பூர்வீக பழங்குடி மரபுகளில் இருந்து வந்தது. ஜூன் மாதத்தில் ஸ்ட்ராபெர்ரி பழங்கள் பழுக்கும் நேரம் என்பதால் இந்த பெயர் சூட்டப்பட்டுள்ளது.

ஜூன் 16: பட்டாம்பூச்சி கிளஸ்டர், செவ்வாய் கிரகம்

ஜூன் 16 அன்று, செவ்வாய் கிரகமும் ரெகுலஸ் என்ற நட்சத்திரமும் சூரிய அஸ்தமனத்திற்கு 90 நிமிடங்களுக்கு முன் மாலையில் அருகருகே தோன்றும். நள்ளிரவுக்குப் பிறகு பட்டாம்பூச்சி கிளஸ்டர் எனப்படும் கோள வடிவ நட்சத்திரக் கூட்டத்தை பைனாகுலர்கள் மூலம் காணலாம்.

ஜூன் 22: லாகூன் நெபுலா

மெஸ்ஸியர் 8 அல்லது லாகூன் நெபுலா எனப்படும் நட்சத்திர உருவாக்கப் பகுதி ஜூன் 22 அன்று மிகத் தெளிவாகக் காணப்படும். வட அரைக்கோளத்தில் உள்ள சிலரால் இதை காண முடியும். தொலைநோக்கி அல்லது பைனாகுலர்கள் மூலம் இதை இன்னும் தெளிவாகக் காணலாம்.

ஜூன் 25: நட்சத்திரங்களைக் காண சிறந்த நேரம்

இந்த நாளில் அமாவாசை என்பதால் வானம் இருட்டாக இருக்கும். பால்வீதி போன்ற வானத்தின் அழகைக் காண இது ஒரு சிறந்த நேரம்.

ஜூன் 27: பூட்டிட் விண்கல் மழை

இது இரவு நேரத்தில் நிகழும் ஒரு விண்கல் மழை. நீங்கள் நள்ளிரவுக்குப் பிறகு பார்த்தால், டஜன் கணக்கான எரியும் நட்சத்திரங்களின் காட்சியைக் காணலாம்.

ஜூன் 30: சந்திரன் மற்றும் செவ்வாயின் சங்கமம்

இந்த நாளில் சந்திரன் (வளர்பிறை பிறை நிலையில்) மற்றும் செவ்வாய் கிரகம் ஒன்றுக்கொன்று மிக அருகில், சுமார் 1∘16′ தூரத்தில் காணப்படும். இந்த தூரம் நமது ஒரு விரலின் நீளத்திற்கு சமம். பைனாகுலர்கள் மூலம் இவற்றை காணலாம். மேலும் “எர்த்ஷைன்” எனப்படும் ஒரு சிறப்பு காட்சியையும் இந்த நாளில் காணலாம்.