பாகிஸ்தானுக்கு உளவு பார்த்ததாக குற்றம் சாட்டப்பட்டு கைது செய்யப்பட்டுள்ள யூடியூபர் ஜோதி மல்ஹோத்ரா அப்பாவி என்றும், அவர் எந்தவிதமான தேச விரோத நடவடிக்கைகளிலும் ஈடுபடவில்லை என்றும் அவரது தந்தை ஹரிஷ் மல்ஹோத்ரா உறுதியாகக் கூறியுள்ளார். தனது மகள் யூடியூப் சேனலுக்காக வீடியோக்களைப் பதிவு செய்வதற்காகவே பாகிஸ்தானுக்குச் சென்றதாகவும், அங்கு அவளுக்கு நண்பர்கள் இருந்தால் தொலைபேசியில் பேசுவதில் என்ன தவறு என்றும் அவர் கேள்வி எழுப்பியுள்ளார். போலீசார் ஜோதியின் கைது குறித்து எந்தவிதமான சரியான ஆதாரங்களையும் இதுவரை சமர்ப்பிக்கவில்லை என்றும் ஹரிஷ் மல்ஹோத்ரா குற்றம் சாட்டியுள்ளார்.

மேலும், போலீசார் தங்கள் வீட்டில் அதிரடியாக நுழைந்து ஜோதி மற்றும் குடும்பத்தினரின் மொபைல் போன்கள், லேப்டாப் மற்றும் வங்கி தொடர்பான முக்கிய ஆவணங்கள் அனைத்தையும் பறிமுதல் செய்துவிட்டதாக அவர் வேதனையுடன் தெரிவித்துள்ளார். இது அவர்கள் குடும்பத்திற்கு மிகுந்த மன உளைச்சலையும் கவலையையும் ஏற்படுத்தியுள்ளதாகவும், போலீசார் உரிய விசாரணை நடத்தி உண்மையை வெளிக்கொணர வேண்டும் என்றும் அவர் வலியுறுத்தியுள்ளார். ஜோதி நிரபராதி என்றும், சட்டப்படி அனைத்து ஒத்துழைப்பையும் வழங்கத் தயாராக இருப்பதாகவும் அவர் தெரிவித்துள்ளார்.