காசா பகுதியில் இஸ்ரேல் நடத்திய கடுமையான வான்வழி தாக்குதல்களில் குழந்தைகள், பெண்கள் மற்றும் பொதுமக்கள் உட்பட குறைந்தது 70 பேர் உயிரிழந்துள்ளதாக தகவல்கள் தெரிவிக்கின்றன. இந்த தாக்குதல்கள் அகதிகள் முகாம்கள், மருத்துவமனைகள் மற்றும் பொதுமக்கள் தங்கியிருந்த பகுதிகளை மையமாகக் கொண்டிருந்தன. பலரின் உடல்கள் இடிபாடுகளுக்குள் சிக்கியுள்ளதால், உயிரிழந்தோர் எண்ணிக்கை மேலும் அதிகரிக்கலாம் என அஞ்சப்படுகிறது. சர்வதேச சமூகம் இந்த தாக்குதலை கடுமையாக கண்டித்து வருகிறது.

இந்த தாக்குதல், இஸ்ரேல் ராணுவ வீரர் ஈடன் அலெக்ஸாண்டர் ஹமாஸ் பிடியில் இருந்து விடுவிக்கப்பட்ட சில மணி நேரங்களுக்குப் பிறகே நிகழ்ந்தது என்பது குறிப்பிடத்தக்கது. அலெக்ஸாண்டர் 583 நாள்களுக்கு பிறகு விடுவிக்கப்பட்டார். இந்த விடுவிப்பு இருபுற பேச்சுவார்த்தையின் ஒரு பகுதியாக இருக்கலாம் என தகவல்கள் கூறினாலும், அதற்குப் பிறகு இஸ்ரேல் மீண்டும் தாக்குதலை தொடங்கியிருப்பது கவலைக்குரியதாகும். காசாவில் உள்ள மக்கள் தொடர்ந்து உயிர் பிழைக்க போராடி வரும் நிலையில், இந்த தாக்குதல்கள் அவர்களின் நிலையை மேலும் மோசமாக்கியுள்ளது.