ஈரோடு மாவட்டம் கோபியில், அரசு ஊழியர் லஞ்சம் வாங்கிய விவகாரம் பெரும் பரபரப்பை ஏற்படுத்தியுள்ளது. கோபி நகராட்சி அலுவலகத்தில் நகரமைப்பு பிரிவு உதவியாளர் சுப்பிரமணியம் ரூ.30 ஆயிரம் லஞ்சம் வாங்கிய போது கையும் களவுமாக பிடிபட்டார்.

திருப்பூர் மாவட்டம் பெருமாநல்லூரை சேர்ந்த 48 வயதான சுப்பிரமணியம், கடந்த 10 ஆண்டுகளாக கோபி நகராட்சி அலுவலகத்தில் உதவியாளராக பணியாற்றி வந்தார். கோபியில் உள்ள சிவில் என்ஜினியர் வருண் என்பவர் புதிய கட்டிடம் கட்ட அனுமதி பெற சுப்பிரமணியத்திடம் விண்ணப்பித்திருந்தார். ஆனால் அனுமதி சான்று வழங்க ரூ.40 ஆயிரம் லஞ்சம் கேட்டதாக கூறப்படுகிறது. இறுதியில் ரூ.30 ஆயிரம் தருமாறு சுப்பிரமணியம் கோரிய நிலையில், லஞ்சம் கொடுக்க மறுத்த வருண் இதுகுறித்து லஞ்ச ஒழிப்புத்துறையில் புகார் அளித்தார்.

இதையடுத்து லஞ்ச ஒழிப்புத்துறை போலீசார் சூழ்ச்சி திட்டமிட்டு ரசாயனம் தடவிய ரூ.30 ஆயிரம் பணத்தை வருணிடம் கொடுத்து சுப்பிரமணியத்திடம் வழங்கச் செய்தனர். பணத்தை பெற்றவுடன் மறைந்திருந்த லஞ்ச ஒழிப்பு போலீசார் சுப்பிரமணியத்தை கைது செய்து ரூ.30 ஆயிரம் பணத்தையும் பறிமுதல் செய்தனர். இந்த சம்பவம் கோபி நகராட்சி அலுவலகத்தில் பெரும் பரபரப்பை ஏற்படுத்தி உள்ளது.