பல்கலைக்கழக மானியக் குழு (யுஜிசி) வெளியிட்டுள்ள புதிய கணிதப் பாடத்திட்ட வரைவு 2025 ஆனது நாடு முழுவதும் பெரும் சர்ச்சையை ஏற்படுத்தியுள்ளது. டெல்லி பல்கலைக்கழகம் உட்பட நாடு முழுவதும் உள்ள கல்வியாளர்கள், ஆராய்ச்சியாளர்கள் மற்றும் கணித வல்லுநர்கள் இந்த வரைவு குறித்து கடுமையான கவலைகளை எழுப்பியுள்ளனர். ரியல் அனாலிசிஸ் மற்றும் அல்ஜீப்ரா போன்ற அடிப்படைத் தலைப்புகளுக்கு இதில் முக்கியத்துவம் குறைவாக இருப்பதால், இது மாணவர்களின் எதிர்காலத்திற்கும், வேலைவாய்ப்பிற்கும் மோசமான விளைவுகளை ஏற்படுத்தும் என்று அவர்கள் கூறுகின்றனர்.

சுமார் ஆயிரம் நிபுணர்கள், இந்த வரைவை உடனடியாகத் திரும்பப் பெற்று, புதிய குழுவை அமைத்து பாடத்திட்டத்தை மறுபரிசீலனை செய்ய வேண்டும் என்று யுஜிசி-யிடம் கூட்டாக மனு அளித்துள்ளனர். காலாவதியான தலைப்புகளுக்கு அதிக முக்கியத்துவம் அளிப்பதும், புள்ளியியல், புரோகிராமிங் மற்றும் நியூமெரிக்கல் மெத்தட்ஸ் போன்ற முக்கியமான பயன்பாட்டுத் தலைப்புகளைப் புறக்கணிப்பதும் அவர்களின் முக்கிய ஆட்சேபனைகளாகும். இந்தப் பாடத்திட்டம் மாணவர்களை உயர்கல்விக்கோ அல்லது நவீன வேலைவாய்ப்புத் துறைக்கோ தயார் செய்யாது என்று நிபுணர்கள் வாதிடுகின்றனர்.