2025-26ஆம் ஆண்டிற்கான தமிழக அரசின் பட்ஜெட்டுக்கான விவாதம் கடந்த 14 ஆம் தேதி தொடங்கி, 15ஆம் தேதி வேளாண் பட்ஜெட் தாக்கலுடன் அதிரடி திருப்பத்தை ஏற்படுத்தியது. எதிர்க்கட்சி தலைவர் எடப்பாடி பழனிசாமி மற்றும் பாஜக தலைவர் அண்ணாமலை போன்றோர் இந்த பட்ஜெட்டிற்கு எதிராக கருத்து தெரிவித்தனர். இதையடுத்து, மார்ச் 17ஆம் தேதி முதல் பட்ஜெட்டின் மீது விவாதங்கள் மற்றும் பதிலுரைகள் நடைபெற்றன.

சட்டசபையில் இன்று நடைபெற்ற விவாதத்தின் போது, எடப்பாடி பழனிசாமி ஒரே நாளில் 4 கொலைகள் நடைபெற்றுள்ளதாக குற்றச்சாட்டு எழுப்பினார். இதற்கு பதிலாக முதல்வர் ஸ்டாலின், “குற்றங்கள் நடந்தது, அதற்கான நடவடிக்கைகள் எடுக்கப்பட்டு வருகின்றன” என்றார். அவர் மேலும், “தூத்துக்குடி சாத்தான் குளம் பிரச்சினையை நீங்கள் மறக்கக்கூடாது” என்றார். அதன்பின்னர், அதிமுகவினர் வெளிநடப்பு செய்ய, ஸ்டாலின் அவர்களுக்குச் சவாலை விடுத்து, “தைரியம் இருந்தால் என் பதிலை கேட்டு வெளியே போங்க” என்று கூறினார்.

இதன் பின்னர், ஸ்டாலின் 2012 மற்றும் 2013 ஆம் ஆண்டுகளில் உள்ள கொலைச் சம்பவங்களை எடுத்துக்காட்டி, “இந்த அரசு குற்றவாளிகளுக்கு தண்டனை வழங்குவதில் சிறப்பு கவனம் செலுத்தி வருகிறது” என்று தெரிவித்தார். 2024ஆம் ஆண்டில் கொலை குற்றங்கள் 6.8% குறைந்துள்ளதாகவும் அவர் கூறினார்.