கரூர் கூட்டநெரிசல் விபத்து தொடர்பாக சிபிஐ விசாரணை நடத்தி வரும் நிலையில், தமிழக வெற்றிக் கழகத் தலைவர் விஜய் சிபிஐ மற்றும் ஓய்வுபெற்ற நீதிபதி அஜய் ரஸ்தோகிக்கு முக்கிய கடிதம் ஒன்றை எழுதியுள்ளார். ஏற்கனவே மூன்று முறை டெல்லியில் ஆஜராகி விளக்கம் அளித்துள்ள விஜய், தனது தனிப்பட்ட சிரமங்கள் மற்றும் வரவிருக்கும் சட்டப்பேரவைத் தேர்தல் பணிகளைக் கருத்தில் கொண்டு, இனி வரும் விசாரணைகளை டெல்லிக்கு பதிலாக சென்னையிலேயே நடத்த வேண்டும் என்று அந்த கடிதத்தில் கோரிக்கை விடுத்துள்ளார்.

சட்டத்தை மதிக்கும் குடிமகனாக விசாரணைக்கு முழு ஒத்துழைப்பு அளிப்பேன் என்று உறுதி அளித்துள்ள அவர், கரூர் சம்பவத்தால் தானும் மிகுந்த மனவேதனை அடைந்துள்ளதாகக் குறிப்பிட்டுள்ளார். தற்போது வேட்பாளர் தேர்வு மற்றும் தேர்தல் அறிக்கை தயாரிப்பு போன்ற முக்கியமான கட்சிப் பணிகளில் தீவிரமாக ஈடுபட்டுள்ளதால், பயண நேரத்தைக் குறைக்கும் வகையில் இந்த இடமாற்றத்தை அவர் கோரியுள்ளார். கரூர் விபத்தில் 41 பேர் உயிரிழந்த சம்பவம் தொடர்பாக சிபிஐ தொடர்ந்து விசாரணை நடத்தி வருவது குறிப்பிடத்தக்கது.