சென்னை: நடப்பு ஐபிஎல் சீசனின் 3-வது லீக் ஆட்டத்தில் மும்பை இந்தியன்ஸ் அணியின் இளம் சுழற்பந்து வீச்சாளர் விக்னேஷ் புதூர், சென்னை சூப்பர் கிங்ஸ் அணிக்கு எதிராக அபாரமாக பந்து வீசி தாக்கம் ஏற்படுத்தினார். முதல் ஓவரிலேயே அரைசதம் அடித்திருந்த ருதுராஜ் கெய்க்வாடின் விக்கெட்டை வீழ்த்திய இவர், அதன் பின் ஷிவம் துபே மற்றும் தீபக் ஹூடா ஆகியோரையும் தூக்கி வீசி அணியின் வெற்றிக்கு முக்கியப் பங்கு வகித்தார். 4 ஓவர்களில் 32 ரன்கள் விட்டுக்கொடுத்து 3 விக்கெட்டுகளை கைப்பற்றிய இவர் ஆட்டத்தின் போக்கையே மாற்றியமைத்தார்.

23 வயதான விக்னேஷ் புதூர், கேரள மாநிலம் மலப்புரத்தைச் சேர்ந்த இடது கை ரிஸ்ட் ஸ்பின்னர். அவர் இதுவரை மாநில அளவில் சீனியர் அணிக்காக விளையாடவில்லை. ஆனால் அண்டர் 14 மற்றும் அண்டர் 19 அணிகளில் திறமையை வெளிப்படுத்தி வந்துள்ளார். தொடக்கத்தில் மித வேகப் பந்து வீச்சில் சிறந்து விளங்கிய அவர், முகமது ஷெரிஃப் என்ற கிரிக்கெட் வீரர் ஆலோசனையின் பேரில் சுழற்பந்து வீச்சில் கவனம் செலுத்தினார்.

திருச்சூரில் உள்ள புனித தாமஸ் கல்லூரி அணிக்காக கேரளா காலேஜ் ப்ரீமியர் டி20 லீகில் விளையாடி அதிக விக்கெட்டுகளை வீழ்த்தி புகழ்பெற்ற இவர், பின்னர் ஜாலி ரோவர்ஸ் கிரிக்கெட் கிளப்பின் முக்கிய வீரராக திகழ்ந்தார். இவரின் திறமையை கண்டு மும்பை இந்தியன்ஸ் அணியால் ரூ.30 லட்சத்துக்கு இந்த சீசனில் ஒப்பந்தம் செய்யப்பட்டது.

‘விக்னேஷ் புதூர் போன்ற திறமைகள் தான் மும்பை இந்தியன்ஸின் பலம்’ என ஆட்டத்துக்குப் பிறகு சூர்யகுமார் யாதவ் பாராட்டு தெரிவித்தார். மேலும், தோனி அவருடன் பேசிக் கரிசனமாக ஆலோசனைகள் வழங்கியதாகவும் தகவல் வெளியாகியுள்ளது. இந்த இளம் வீரர் எதிர்காலத்தில் கிரிக்கெட் உலகில் பல சாதனைகளை படைக்க வாழ்த்துகள்.