ராணிப்பேட்டை மாவட்டம் அரக்கோணம் அருகே மூகாம்பிகை நகர் பகுதியில் உள்ள வீடுகளில் அண்மையில் தொடர்ச்சியாக கொள்ளை சம்பவம் நடைபெற்றது.

அம்மாவட்டத்தில் வசிக்கும் மூதாட்டி அமுதா என்பவர், தனது உறவினரின் உடல்நிலை மோசமாக உள்ளதன் காரணமாக வேலூர் அரசு மருத்துவமனைக்கு சென்றிருந்தார். அவர் நள்ளிரவில் வீடு திரும்பிய போது, வீட்டு கதவின் பூட்டு உடைக்கப்பட்டிருந்ததை பார்த்து அதிர்ச்சி அடைந்தார். உள்ளே சென்று பார்த்த போது, ஏழு சவரன் தங்க நகை, அரை கிலோ வெள்ளி பொருட்கள் மற்றும் 20 ஆயிரம் ரூபாய் ரொக்கப்பணம் கொள்ளை போயிருப்பது தெரியவந்தது.

அதே பகுதியில் வசிக்கும் தனியார் நிறுவன ஊழியர் யுவராஜின் வீட்டில் மூன்று சவரன் நகை மற்றும் அரை கிலோ வெள்ளி பொருட்கள் மர்ம நபர்களால் திருடப்பட்டன. தகவல் அறிந்த அரக்கோணம் நகர காவல்துறை அதிகாரிகள் சம்பவ இடத்திற்கு வந்து விசாரணை மேற்கொண்டனர். கைரேகை நிபுணர்களை வரவழைத்து தடயங்கள் சேகரிக்கப்பட்டு, தொடர்ச்சியான கொள்ளை சம்பவம் அந்த பகுதியில் பெரும் பரபரப்பை ஏற்படுத்தியுள்ளது.