ரயில் பயணிகளின் நீண்ட கால காத்திருப்பிற்கு முற்றுப்புள்ளி வைக்கும் வகையில், நாட்டின் 48 முக்கிய நகரங்களில் ரயில்களின் எண்ணிக்கையை இருமடங்காக அதிகரிக்க மத்திய அரசு திட்டமிட்டுள்ளது. 2030-ஆம் ஆண்டிற்குள் இந்த இலக்கை எட்ட ரயில்வே அமைச்சகம் புதிய உள்கட்டமைப்பு பணிகளை முடுக்கிவிட்டுள்ளது. சென்னை, கோவை, மதுரை உள்ளிட்ட முக்கிய நகரங்களில் புதிய ரயில்வே முனையங்கள், கூடுதல் நடைமேடைகள் மற்றும் நவீன சிக்னல் அமைப்புகள் உருவாக்கப்பட உள்ளன. ரயில்வே அமைச்சர் அஸ்வினி வைஷ்ணவ் கூறுகையில், இந்த மெகா கோச்சிங் டெர்மினல்கள் மூலம் பயணிகளுக்கு எளிதில் உறுதி செய்யப்பட்ட டிக்கெட்டுகள் கிடைக்க வழிவகை செய்யப்படும் என தெரிவித்தார்.

ரயில்வே வாரியத் தலைவர் சதீஷ் குமார் அனைத்து மண்டல பொது மேலாளர்களுக்கும் இது தொடர்பான பணிகளை விரைந்து முடிக்க உத்தரவிட்டுள்ளார். இந்த திட்டத்தின் கீழ் ரயில் நிலையங்கள் மட்டுமின்றி, அவற்றை சுற்றியுள்ள சிறிய நிலையங்களின் திறனும் மேம்படுத்தப்படும். இதன் மூலம் எக்ஸ்பிரஸ் மற்றும் உள்ளூர் ரயில்களின் இயக்கம் தடையின்றி நடைபெறும். குறுகிய கால மற்றும் நீண்ட கால அடிப்படையில் செயல்படுத்தப்பட உள்ள இந்த திட்டத்தினால், அடுத்த 5 ஆண்டுகளில் நாட்டின் ரயில் போக்குவரத்து நெட்வொர்க் மிகப்பெரிய வளர்ச்சியை எட்டும் என எதிர்பார்க்கப்படுகிறது.