யுபிஐ பயனர்களுக்கு ஒரு முக்கிய செய்தி. செப்டம்பர் 15, 2025 முதல் யுபிஐ பரிவர்த்தனை விதிகளில் பெரிய மாற்றங்கள் வந்துள்ளன. நேஷனல் பேமென்ட்ஸ் கார்ப்பரேஷன் ஆஃப் இந்தியா (NPCI), சில குறிப்பிட்ட வகைகளில் பணம் செலுத்துவதற்கான அதிகபட்ச வரம்பை அதிகரித்துள்ளது. இன்சூரன்ஸ் பிரீமியம், மூலதனச் சந்தை, கடன் இஎம்ஐ மற்றும் பயணம் தொடர்பான கட்டணங்களுக்கு ஒரு நாளைக்கு ₹10 லட்சம் வரை பணம் அனுப்பலாம். இந்த புதிய விதிகள், வியாபாரிகளுக்கு பணம் செலுத்துவதற்கு (P2M) மட்டுமே பொருந்தும்.

மாற்றியமைக்கப்பட்ட விதிகளின்படி, இன்சூரன்ஸ் மற்றும் மூலதனச் சந்தையில் முதலீடு செய்வதற்கான வரம்பு ₹2 லட்சத்திலிருந்து ₹5 லட்சமாக அதிகரிக்கப்பட்டுள்ளது. அதேபோல், பயணக் கட்டணங்களுக்கான வரம்பும் ₹1 லட்சத்திலிருந்து ₹5 லட்சமாக உயர்த்தப்பட்டுள்ளது. மேலும், கடன் மற்றும் இஎம்ஐ வசூலுக்கான தினசரி வரம்பு ₹10 லட்சமாக நிர்ணயிக்கப்பட்டுள்ளது. இருப்பினும், தனிநபருக்கு தனிநபர் (P2P) பரிவர்த்தனைக்கான தினசரி வரம்பு ₹1 லட்சம் என மாற்றமில்லாமல் உள்ளது.