இந்திய கிரிக்கெட் வரலாற்றில் யாரும் செய்யாத ஒரு அபூர்வ சாதனையை ஸ்ரேயஸ் ஐயர் படைத்துள்ளார். மூன்று வெவ்வேறு அணிகளை ஐபிஎல் பிளேஆஃப் சுற்றுக்கு தகுதி பெறச் செய்த ஒரே கேப்டன் என்ற வரலாற்றுச் சாதனையை அவர் தன் வசமாக்கியுள்ளார். நேற்றைய ராஜஸ்தான் ராயல்ஸ் அணிக்கு எதிரான போட்டியில் பஞ்சாப் கிங்ஸ் அணி திரில் வெற்றி பெற்றது. இந்த வெற்றியின் மூலம், 2014-ம் ஆண்டுக்குப் பிறகு முதல் முறையாக பஞ்சாப் அணி பிளேஆஃப் சுற்றுக்குள் நுழைந்துள்ளது. இந்த அணியை திறமையாக வழிநடத்திய கேப்டன் ஸ்ரேயஸ் ஐயரின் வியூகங்களும், ஆட்டத்திறனும் மிக முக்கிய பங்காற்றியுள்ளன.

அதுமட்டுமல்லாமல், கடந்த 2024-ம் ஆண்டு கொல்கத்தா நைட் ரைடர்ஸ் அணிக்கு கேப்டனாக பொறுப்பேற்று அந்த அணி சாம்பியன் பட்டம் வெல்ல முக்கிய காரணமாக இருந்தார் ஸ்ரேயஸ். அவரது சிறப்பான கேப்டன்சியின் கீழ், கொல்கத்தா அணி அபாரமான ஆட்டத்தை வெளிப்படுத்தி கோப்பையை கைப்பற்றியது. இதற்கு முன்னதாக, 2020-ம் ஆண்டு டெல்லி கேப்பிடல்ஸ் அணியின் கேப்டனாக இருந்தபோது, அந்த அணியை ஐபிஎல் இறுதிப் போட்டி வரை அழைத்துச் சென்றார். இதன் மூலம், ஸ்ரேயஸ் ஐயர் தான் தலைமை தாங்கும் ஒவ்வொரு அணியையும் வெற்றியை நோக்கி அழைத்துச் செல்லும் திறமை வாய்ந்த கேப்டன் என்பதை நிரூபித்துள்ளார். மூன்று வெவ்வேறு அணிகளை பிளேஆஃப் சுற்றுக்கு தகுதி பெறச் செய்து, ஒரு அணிக்கு கோப்பையையும் வென்று கொடுத்திருப்பது அவரது கிரிக்கெட் வாழ்க்கையில் ஒரு பொன் எழுத்துக்களால் பொறிக்கப்பட வேண்டிய சாதனையாகும்.