பிரதமர் நரேந்திர மோடியின் கடந்த நான்கு ஆண்டு கால வெளிநாட்டுப் பயணங்களுக்கான செலவு குறித்த தகவல்களை மத்திய அரசு நாடாளுமன்றத்தில் சமர்ப்பித்துள்ளது. 2021 முதல் 2024 வரை அவர் 38 நாடுகளுக்கு மேற்கொண்ட பயணங்களுக்கு மொத்தம் ₹295 கோடி செலவிடப்பட்டுள்ளது. திரிணாமுல் காங்கிரஸ் ராஜ்யசபா உறுப்பினர் டெரிக் ஓ’பிரைனின் கேள்விக்கு வெளியுறவுத்துறை இணை அமைச்சர் கீர்த்திவர்தன் சிங் இந்த தகவலைத் தெரிவித்தார்.

நடப்பு ஆண்டில், அமெரிக்கா மற்றும் பிரான்ஸ் உட்பட மொத்தம் ஐந்து நாடுகளுக்கு மோடி மேற்கொண்ட பயணங்களுக்காக ₹67 கோடிக்கு மேல் செலவிடப்பட்டுள்ளது. இருப்பினும், இந்த காலகட்டத்தில் வேறு சில நாடுகளுக்கு மேற்கொண்ட பயணங்களுக்கான செலவுகளை மத்திய அரசு இன்னும் தெரிவிக்கவில்லை. தரவுகளின்படி, 2021 இல் சுமார் ₹36 கோடி, 2022 இல் சுமார் ₹56 கோடி, 2023 இல் ₹93 கோடி மற்றும் 2024 இல் சுமார் ₹109 கோடி செலவிடப்பட்டுள்ளது. நடப்பு ஆண்டில் பிரான்ஸ் பயணத்திற்கு ₹25 கோடியும், 2023 இல் அமெரிக்க பயணத்திற்கு ₹22 கோடியும் அதிகபட்சமாக செலவிடப்பட்டது.