காணாமல் போய் 25 ஆண்டுகளுக்குப் பிறகு கண்டறியப்பட்ட 70 வயது தாயை, மதம் மாறினால் மட்டுமே வீட்டிற்குள் அனுமதிப்பேன் என்று ஜார்கண்ட் மாநிலத்தைச் சேர்ந்த மகன் நிபந்தனை விதித்துள்ளார். கொல்கத்தா காப்பகத்தில் மீட்கப்பட்ட சுஷிலா முர்மு தனது மகனைத் தொடர்பு கொண்டபோது, அவர் இந்து மதத்திற்கு மாறினால் மட்டுமே குடும்பத்தில் சேர்த்துக்கொள்வதாக மகன் மதன் பெஸ்ரா பிடிவாதமாகத் தெரிவித்துள்ளார்.

தனது மத நம்பிக்கையைக் கைவிட மறுத்த சுஷிலா, கண்ணீருடன் காப்பகத்திலேயே தங்கியுள்ளார். பாசத்தை விட மதமே பெரிது எனக் கருதும் மகனின் செயல் சமூக ஆர்வலர்களிடையே அதிர்ச்சியை ஏற்படுத்தியுள்ளது. தற்போது உள்ளூர் காவல்துறையினர் மற்றும் அதிகாரிகள் அந்த மகனுக்கு அறிவுரை கூறி, தாயை எவ்வித நிபந்தனையுமின்றி ஏற்குமாறு வலியுறுத்தி வருகின்றனர்.