பீகார் முதல்வர் நிதிஷ் குமார் பெண் மருத்துவர் ஒருவரின் ஹிஜாப்பை இழுத்த விவகாரம் பெரும் சர்ச்சையை ஏற்படுத்தியுள்ளது. பாட்னாவில் நடந்த பணி நியமன கடிதம் வழங்கும் விழாவில் அவர் இவ்வாறு நடந்து கொண்ட வீடியோ சமூக வலைதளங்களில் வைரலாகி வருகிறது. இந்த செயலை சமாஜ்வாதி கட்சி எம்.பி. இக்ரா ஹசன் கடுமையாக சாடியுள்ளார். ஒரு பெண்ணின் கண்ணியத்திற்கும் மத அடையாளத்திற்கும் எதிரான இந்த செயல் மிகவும் வெட்கக்கேடானது என்று அவர் கூறியுள்ளார். பிடிபி தலைவர் மெகபூபா முப்தியும் இந்த சம்பவத்திற்காக நிதிஷ் குமார் பதவி விலக வேண்டும் என்று வலியுறுத்தியுள்ளார்.

ராஷ்டிரிய ஜனதா தளம் கட்சி நிதிஷ் குமாரின் மனநிலை குறித்து கேள்வி எழுப்பியுள்ளதுடன் அவர் முழுமையாக ஆர்எஸ்எஸ் சித்தாந்தத்திற்கு மாறிவிட்டாரா என்றும் விமர்சித்துள்ளது. இந்த சம்பவத்தின் போது துணை முதல்வர் சாம்ராட் சவுத்ரி தடுக்க முயன்றதும் மற்ற அமைச்சர்கள் சிரித்ததும் வீடியோவில் பதிவாகியுள்ளது. இந்த விவகாரம் பீகார் அரசியலில் பெரும் கொந்தளிப்பை ஏற்படுத்தியுள்ளது. ஒரு மாநிலத்தின் முதல்வரே இத்தகைய அநாகரீகமான செயலில் ஈடுபட்டது பெண்கள் பாதுகாப்பு குறித்த அச்சத்தை ஏற்படுத்துவதாக சமூக ஆர்வலர்கள் கவலை தெரிவித்துள்ளனர்.