பிரதமர் நரேந்திர மோடியின் கனவுத் திட்டமான புதிய நாடாளுமன்றக் கட்டிடத்தின் கட்டுமானச் செலவு ஆரம்ப மதிப்பீடான ₹971 கோடியிலிருந்து தற்போது ₹1,284 கோடியாக உயர்ந்துள்ளது. தகவல் அறியும் உரிமைச் சட்டத்தின் கீழ் பெறப்பட்ட தகவல்கள் மூலம் இந்த கூடுதல் செலவு வெளிச்சத்திற்கு வந்துள்ளது. இருப்பினும், மக்களின் வரிப்பணம் எந்தெந்தப் பணிகளுக்கு எவ்வளவு செலவிடப்பட்டது என்பது குறித்த விரிவான விவரங்களை வழங்க மத்திய அரசு தொடர்ந்து தயக்கம் காட்டி வருகிறது.

இது தொடர்பாக எழுப்பப்பட்ட கேள்விகளுக்கு ஜிஎஸ்டி உயர்வு மற்றும் இடுபொருட்களின் விலை அதிகரிப்பு போன்ற காரணங்களை அமைச்சகம் முன்வைக்கிறது. ஆனால், உட்புற அலங்காரம் மற்றும் தளபாடங்களுக்கான துல்லியமான செலவுப் பட்டியலை வழங்காமல் 848 நாட்களாக இழுத்தடிக்கப்படுவதாக புகார்கள் எழுந்துள்ளன. பொதுமக்களின் பணத்திற்கான கணக்கைக் காட்ட வேண்டிய கட்டாயத்தில் உள்ள அரசு, சரியான பதிலை அளிக்காமல் மௌனம் காப்பது பல்வேறு சந்தேகங்களை கிளப்பியுள்ளது.